Դիլիջան քաղաքում անհայտ անձը կամ անձինք հրկիզել են Դիլիջան ազգային պարկի Պահպանության ծառայության ղեկավարին ամրակցված ծառայողական մեքենան։
ՀՀ շրջակա միջավայրի նախարար Ռոմանոս Պետրոսյանը ֆեյսբուքի իր էջում կատարած գրառման միջոցով հայտնել է, որ դեպքը տեղի է ունեցել սեպտեմբերի 7-ին՝ կեսգիշերն անց։
«Բնականաբար, դեպքի մասին իրազեկել ենք ՀՀ Ոստիկանություն. այս պահին նյութեր են նախապատրաստվում: Ունենք հիմնավոր կասկածներ, որ կատարվածը պայմանավորված է վերջինիս մասնագիտական գործունեությամբ։ Լիահույս ենք, որ իրավապահները սեղմ ժամկետներում կբացահայտեն դեպքը, և այն կարժանանա համաչափ իրավական գնահատականի»,- նշել է Պետրոսյանը։
Նախարարը նաև նախազգուշացրել է հնարավոր կատարողներին և/կամ պատվիրատուներին, մասնավորապես, բնապահպանության և շրջակա միջավայրի պահպանության և պաշտպանության ոլորտում օրենքի գերակայությունն այլընտրանք չունի։
«Մեր համառ պայքարն ավելի՛ լայն թափով ու է՛լ ավելի մեծ նվիրումով ենք առաջ մղելու՝ հանուն Հայաստանի Հանրապետության և ՀՀ քաղաքացու»,- տեղեկացրել է Ռոմանոս Պետրոսյանը։
