Պետական եկամուտների կոմիտեն հիշեցնում է՝ անձնական օգտագործման նպատակով ժամանակավոր ներմուծված տրանսպորտային միջոցները պետք է արտահանվեն մինչեւ սեպտեմբերի 30-ը։
Բանն այն է, որ ֆիզիկական անձանց կողմից օտարերկրյա պետությունում գրանցված անձնական օգտագործման տրանսպորտային միջոցների ժամանակավոր ներմուծումը Հայաստանի Հանրապետության տարածք թույլատրվում է ոչ ավելի, քան 1 տարի ժամկետով:
Համավարակով պայմանավորված՝ նախորդ տարի ԵՏՀ խորհրդի թիվ 47 որոշմամբ ժամկետը երկարաձգվել էր։ Եվ այդ վերջնաժամկետը լրանում է այս տարվա սեպտեմբերի 30-ին։ Այդ ժամկետում տրանսպորտային միջոցները չարտահանելու դեպքում ֆիզիկական անձինք կվճարեն տուգանքներ։
Ի՞նչ չափի տուգանքի մասին է խոսքը։
Միանգամից ասենք՝ փոքր թվի մասին չէ խոսքը։ ՀՀ մաքսային օրենսգրքի 199-րդ հոդվածի 1-ի կետի համաձայն՝ հետագա արտահանման պարտավորությամբ Հայաստանի Հանրապետություն ներմուծված տրանսպորտային միջոցները սահմանված ժամկետում չարտահանելն առաջացնում է տուգանքի նշանակում` խախտման օրվա դրությամբ այդ տրանսպորտային միջոցների համար «ներմուծում` ազատ շրջանառության համար» մաքսային ռեժիմով նախատեսված մաքսային վճարների մեծության 50 տոկոսի չափով:
Մեկ հստակեցում եւս անենք. եթե մեքենաները չունեն հայկական համարանիշներ, Հայաստան են ներկրվել «ժամանակավոր ներմուծում» ռեժիմով, ապա անպայման պետք է արտահանվեն։ Եվ դրա համար 20 օր ժամանակ կա ընդամենը։
Ռուսական համարանիշներով ավտոմեքենաների պարագան այլ է հասկանալի պատճառով. դրանք ԵԱՏՄ տարածքում են։
