«Ավրորա» մարդասիրական հիմնադրամի մեկնարկը տրվել է մայիսին՝ Դիլիջանի միջազգային դպրոցում: Իսկ նախօրեին Ստեփանակերտի արցախյան գրասենյակում հիմնադրամի պատասխանատուների մասնակցությամբ շահագրգիռ քննարկումներ են ծավալվել «Ավրորան՝ Արցախին» ծրագրի նոր փուլի հայտերի հստակեցման ուղղությամբ:
Ըստ գրասենյակի ղեկավար Նարինե Աղաբալյանի, ծրագրին մասնակից դառնալու հայտերի շրջանակը բավականին ընդգրկուն է: Շուրջ 70 հայտ է դրված սեղանին, որոնք հասցեագրված են տնտեսության ամենատարբեր ուղղությունների եւ ոլորտների: «Մեր նպատակն է բոլոր ջանքերը նպատակաուղղել պատերազմից հետո դժվարին ու բարդ իրադրությունում հայտնված Արցախի ժողովրդի հոգեբանական հաղթահարմանը, ավերված տնտեսության վերականգնմանը, մշտական բնակավայրերից բռնի տեղահանված ընտանիքների սոցիալական պայմանների բարելավմանը եւ նրանց զբաղվածության խնդրի լուծմանը»,- ասում է նա: Ն. Աղաբալյանի տեղեկացմամբ, տասնյակ կազմակերպություններ, այդ թվում՝ նաեւ միջազգային, իրենց առաջարկություններն են ներկայացրել նախագծերի վերաբերյալ, որոնք քննարկման ընթացքում կուսումնասիրվեն եւ «առաջնահերթության կարգով կընթացքավորվեն»:
Ինչպես իր խոսքում նշեց բժշկական գիտությունների դոկտոր, պրոֆեսոր Արա Բաբլոյանը, այսօր հրատապ է մնում բժշկական անձնակազմի համալրումը արհեստավարժ մասնագետներով, որոնք իրենց փորձը կարող են փոխանցել երիտասարդներին՝ արագ կողմնորոշվելու հետպատերազմյան շրջանում՝ վիրավոր զինվորների բուժման եւ ապաքինման գործն առավել համակարգված կազմակերպելու համար: Այս տեսանկյունից պրոֆեսորը գոհունակությամբ արձանագրեց. «Բարեբախտաբար, հաջողվում է համագործակցությունն իր նպատակին ծառայեցնել, երիտասարդ բուժաշխատողներին վերապատրաստել եւ ուղղորդել իրենց առաքելության իրագործմանը»:
ԱՀ պետնախարար Արտակ Բեգլարյանի դիտարկմամբ, մասնագետների խնդիրն առկա է ինչպես մայրաքաղաք Ստեփանակերտում, այնպես էլ շրջաններում: Եվ իրավիճակը շտկելու համար առաջարկեց կարճաժամկետ ծրագրերով, որոշակի ֆինանսական աջակցությամբ խթանել Երեւանից մասնագետների հրավիրումը Արցախ: Պետնախարարը նշեց, թե խոսքը վերաբերում է տնտեսության ամենատարբեր ոլորտների եւ ճյուղերի, որտեղ հատկապես պատերազմի հետեւանքները հաղթահարելու համար շատ է զգացվում արհեստավարժ մասնագետների կարիքը: Ահա տնտեսության զարգացման ծրագրերում առանձնացվող այն ոլորտները, որոնց աշխուժացումը շահավետ կլիներ պատերազմից դուրս եկած երկրի համար. արտադրություն, սոցիալական ձեռներեցություն, գյուղատնտեսություն: Նախագծերի քննարկման ժամանակ ընդգծվեց, թե հաշվի առնելով գյուղատնտեսական ուղղվածության հայտերի առաջնահերթությունը, ծրագրի մեկնարկը կտրվի Բերդաշեն, Գիշի, Հաթերք եւ Քռասնի համայնքներում, որտեղ ձեռներեցները կզբաղվեն գինեգործությամբ, կաթնամթերքի, բանջարեղենի ու մրգեղենի (հատապտուղներ) մշակմամբ:
Ծրագիրն, անշուշտ, նոր աշխատատեղեր է ենթադրում: Հիմնադրամի պատասխանատուների հավաստմամբ, «175 հոգի կաշխատի համայնքային մակարդակում, 56 մարդ՝ սոցիալ-հոգեբանական աջակցության կենտրոններում»: Մինչեւ տարեվերջ Հայաստանի եւ սփյուռքի մասնագետների ներգրավմամբ կպատրաստվեն 75 սոցիալական աշխատողներ:
