Սյունիքի մարզպետի հետախուզվող որդին տեղափոխվել է Արմավիր ՔԿՀ. նա ինքնակամ է ներկայացել

Երեկ՝ սեպտեմբերի 22-ին, Սյունիքի մարզպետ Մելիքսեթ Պողոսյանի որդին՝ Կարեն Պողոսյանը, ինքնակամ ներկայացել է Քննչական կոմիտեի հատկապես կարևոր գործերով քննության (ՀԿԳՔ) գլխավոր վարչության մարդու դեմ ուղղված հանցագործությունների քննության վարչություն:

Տեղեկությունը ՀԺ-ին փոխանցել է կոմիտեի մամուլի խոսնակ Վարդան Թադևոսյանը: Նա նաև տեղեկացրեց, որ Պողոսյանը տեղափոխվել է «Արմավիր» քրեակատարողական հիմնարկ։ 

Ըստ Քննչական կոմիտեի՝ Կարեն Պողոսյանը որպես մեղադրյալ է ներգրավվել ՀՀ ՔՕ 34-104-րդ հոդվածի 2-րդ մասի 1-ին և 6-րդ կետերի (սպանության փորձ, որ կատարվել է շատերի կյանքի համար վտանգավոր եղանակով) և ՀՀ ՔՕ 235-րդ հոդվածի 1-ին մասով (ապօրինի կերպով զենք-զինամթերք ձեռք բերելը, կրելը կամ փոխադրելը):

Հիշեցնենք, որ զինված միջադեպը տեղի էր ունեցել սույն թվականի հուլիսի 13-ին՝ ժամը 01:00-ի սահմաններում, Գորիս քաղաքի Գետափնյա և Գարեգին Նժդեհի փողոցների հատման խաչմերուկում: Ենթադրյալ հանցագործություն կատարած անձինք, բացահայտ անհարգալից վերաբերմունք դրսևորելով մոտակա շենքերի բնակիչների նկատմամբ, կրակոցներ էին արձակել Գորիս քաղաքի երկու բնակիչների ուղղությամբ՝ պատճառելով մարմնական վնասվածքներ: