Աշուն է. օրերը կարճանում են՝ նոր-նոր դպրոցն ավարտած աղջիկների շրջազգեստների նման։ Այդուհանդերձ, աշնանային դեպրեսիաներից խուսափելու համար առաջանում է թեթև ու հումորային ֆիլմերի խիստ անհրաժեշտություն։ Ինչ նայել այս օրերին՝ կարդացեք ստորև։
Barfuss, 2005
Սիրահարված մարդը պատրաստ է ամեն բանի հանուն իր սիրո: Նիկը անընդհատ ընկնում է անախորժությունների մեջ և ստիպված է լինում փոխել աշխատանքի վայրը: Ընտանիքը նրան լուրջ չի վերաբերվում, քանի որ Նիկն ամեն բանի մատների արանքով է նայում, բայց մի գեղեցիկ օր աշխատելով հոգեբուժարաններից մեկում՝ նա հանդիպում է Լայլային, և աղջիկը այնքան է տարվում Նիկիով, որ ամենուր հետևում է նրան. նա նույնիսկ փախչում է հիվանդանոցից և գնում Նիկի ետևից: Շուտով Նիկին կհասկանա, որ չի կարող ապրել առանց աղջկա:
The Wedding Date, 2005
Թեթև երեկոն երաշխավորված է, եթե ձեր ընտրությունը կանգ է առել հենց այս ֆիլմի վրա: 2005 թ. էկրաններ է բարձրացել «Հարսանեկան ամսաթիվ» ֆիլմը, որի գլխավոր դերերում են ամերիկյան ֆիլմերի սիրելի դերասաններ Դերմոտ Մալրունին, Դեբրա Մեսինգը, Էմի Ադամսը և այլք: Քեթը բաժանվել է իր սիրելիից, բայց հիմա ավելի մեծ խնդրի առաջ է կանգնած. նա պետք է մասնակցի քրոջ հարսանիքին, իսկ այնտեղ լինելու է նրա նախկին ընկերը, և Քեթը չի կարող հենց այնպես հայտնվել արարողությանը: Ի՞նչ անել: Գուցե՞ վարձել որևէ մեկին, ով կկարողանա այդ երեկո նրա ընտրյալի դերում հանդես գալ: Գեղեցիկ տղամարդը միանգամից գերում է աղջկա ծնողներին և ամեն բան անում է, որ արդարացնի Քեթի հույսերը՝ չէ որ աղջիկը դրա դիմաց նրան վճարելու է:
Life as We Know It, 2010
Հոլին գեղեցիկ, երիտասարդ և միայնակ կին է: Էրիկը կնամոլ և բռի տղամարդ է: Նրանց ծանոթացնում են ընդհանուր ընկերներ, սակայն հենց առաջին հայացքից Հոլին հակակրանք է զգում Էրիկի հանդեպ: Այնպես է պատահում, որ իրենց ընկերներ-ամուսինները ավտովթարի հետևանքով մահանում են, և իրենց փոքրիկը մնում է Հոլիի և Էրիկի խնամակալության տակ: Ժամանակն ամեն բան իր տեղն է գցում:
Leap Year, 2009
Ցուցակի մյուս գեղեցիկ ֆիլմը 2009 թ. Անանդ Թակերի «Ինչպես ամուսնանալ 3 օրում» ֆիլմն է: Ֆիլմի գլխավոր դերերում են Էմի Ադամսը, Մեթյու Գուդը, Ադամ Սքոթը և այլք: Ի՞նչ անել, եթե ձեր սիրելին չի վարվում այնպես, ինչպես դուք եք ուզում: Դուք ինքներդ եք քայլ անում, քանի որ դա միակ լուծումն է: Չնայած փոփոխվող ժամանակաշրջանների ու ավանդույթների՝ համընդհանուր կարծիքի համաձայն հենց տղամարդը պետք է առաջարկություն անի: Գլխավոր հերոսուհին մեկնում է Դուբլին, որ ամուսնության առաջարկություն անի իր սիրելիին, քանի որ ավանդույթի համաձայն փետրվարի 29-ը հենց այն օրն է, երբ կինը կարող է քայլ անել: Ճանապարհին Աննան բազում խնդիրների է հանդիպում, բայց այս ճանապարհորդությունը մեկընդմիշտ փոխում է նրան և ճիշտ հարաբերությունների մասին նրա պատկերացումները:
The Royal Tenenbaums, 2001
Այս ֆիլմը պատմում է Տենենբաում ընտանիքի անդամների փոխհարաբերությունների մասին: Ընտանիքի երեխաներից յուրաքանչյուրը զգալի հաջողությունների է հասել.Չեսը ֆինանսիստ է, Ռիչին՝ թենիսիստ, իսկ Մարգոն՝ գրող: Ընտանիքի երեխաները մեծացել են, և ինչպես սովորաբար է լինում է, լքել են հայրական տունը: Բայց օրերից մի օր ընտանիքի հայրը ծանր հիվանդանում է, և զավակները նորից միավորվում են: Միասին նրանք կհաղթահարեն բոլոր դժվարությունները:
Լուսանե Ջալալյան
