Ուղիղ մեկ տարի առաջ այս օրը՝ առավոտյան 7:10-ին, Ադրբեջանը Լեռնային Ղարաբաղի ուղղությամբ սկսեց հարձակում: Հայաստանում ու Արցախում հայտարարվեց ռազմական դրություն և զորահավաք:
44 օր շարքային զինվորից մինչև հրամանատար, պայմանագրայինից մինչև ռազմաճակատ մեկնած կամավորական կենաց ու մահու պայքար մղեցին՝ պաշտպանելու հայրենի հողը և ժողովրդին: Արցախի դեմ սանձազերծված ագրեսիան ուղեկցվում էր ադրբեջանական զինված ուժերի կողմից միջազգային նորմերի բազմաթիվ կոպիտ խախտումներով, այդ թվում՝ քաղաքացիական բնակչության և կենսական ենթակառուցվածքների դիտավորյալ թիրախավորմամբ, ռազմագերիների և քաղաքացիական պատանդների նկատմամբ իրականացված անմարդկային խոշտանգումներով։
Նոյեմբերի 9-ի երեկոյան հայտնի դարձավ՝ կեսգիշերից մեկ ժամ անց պատերազմը դադարելու է. Ռուսաստանի, Հայաստանի և Ադրբեջանի նախագահներն այդ մասին հայտարարություն են ստորագրել: Հայկական կողմը կորցրեց Արցախի հարակից 7 շրջանները, Հադրութը, Շուշին: Որոշվեց՝ Լեռնային Ղարաբաղում տեղակայվելու են ռուս խաղաղապահներ, տարածաշրջանում բացվելու են բոլոր տնտեսական և տրանսպորտային կապերը, Հայաստանի տարածքով ցամաքային կապ է ապահովվելու Ադրբեջանի և Նախիջևանի միջև:
Ոչ պակաս ցավոտ էին մարդկային կորուստները. ըստ պաշտոնապես հրապարակված վերջին տվյալների՝ 44-օրյա պատերազմում զոհվեց 3 777 անձ: 243 մարդու գտնվելու վայրը մինչ օրս անհայտ է համարվում: Լեռնային Ղարաբաղի տասնյակ հազարավոր բնակիչներ տեղահանվեցին:
2020 թվականին Ադրբեջանի կողմից Արցախի դեմ սանձազերծած 44-օրյա պատերազմում զոհված հայորդիների հիշատակին Հայաստանում և Արցախում այսօր՝ ժամը 11:00-ին, կհայտարարվի մեկ րոպե լռություն։
