Համայնքների տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի շրջանակում Հովտամեջում մեկնարկել են Երևանյան փողոցի մայթերի և Հ. Բաղրամյան փողոցի բարեկարգման աշխատանքները:
Այս մասին հայտնում են Արմավիրի մարզպետարանից: Շինարարական աշխատանքներն իրականացվում են «Խլղաթյան Շին» ՍՊԸ-ի կողմից: Երևանյան փողոցի մայթերի սալիկապատումը՝ շուրջ 640 քմ, կիրականացվի կիսախողովակներ տեղադրելուց հետո, ինչը կնպաստի ոռոգման ջրի պատշաճ մատակարարմանը՝ նվազեցնելով ջրի կորուստը:
Համայնքի գերեզմանատուն տանող Հ. Բաղրամյան փողոցում՝ ավելի քան 1560 քմ, նախատեսվում է կատարել ջրատարի հիմնանորոգման աշխատանքներ, որին կհաջորդեն տարածքի հարթեցումն ու տուֆե քարերի տեղադրումը՝ սալարկումը: Ծրագրով նախատեսված աշխատանքների արդյունքում կապահովվի անվտանգ երթևեկ հետիոտների և տրանսպորտային միջոցների համար, իսկ համայնքն ավելի բարեկարգ տեսք կունենա:
