«Ադրբեջանական ավիաուղիներ» կազմակերպությունը (AZAL) սկսել է օգտագործել Հայաստանի օդային տարածքը՝ Բաքվից Նախիջևան ուղևորափոխադրումների համար։ Այս մասին հաղորդում է ռուսական ТАСС գործակալությունը։
«Այս քայլը ցույց է տալիս տարածաշրջանում Ադրբեջանի տրանսպորտային հաղորդակցության ապաշրջափակման վճռական պատրաստակամությունը, ինչը բխում է բոլոր սահմանակից երկրների շահերից»,-ասվում է հայտարարության մեջ։
Ավիաընկերությունը նշել է, որ նոր երթուղու շնորհիվ կկրճատվեն թռիչքների ժամանակը և վառելիքի սպռումը։ AZAL-ը նաև հստակեցրել է, որ Հայաստանի և Իրանի տարածքով երթուղիները կօգտագործվեն զուգահեռաբար։ «Այսուհետ AZAL-ը այդ ուղևորափոխադրումները կատարելիս կարող է օգտագործել բոլոր գոյություն ունեցող օդային միջանցքները՝ այդ թվում Հայաստանի և Իրանի տարածքում»,- ասվում է ավիաընկերության հաղորդագրության մեջ։
Երեքշաբթի հայտնի դարձավ, որ Իրանի իշխանությունները փակել են Նախիջևան տանող միջանցքը՝ Ադրբեջանի ռազմատրանսպորտային ավիացիայի համար։
Ավելի ուշ սոցիալական ցանցերում տեղեկատվություն տարածվեց, որ իբրև Թեհրանը նույնպես փակել է իր օդային տարածքը Բաքվից Նախիջևան ավիափոխադրումների համար։ Ադրբեջանը և Հայաստանը պաշտոնապես չեն փակել իրենց օդային տարածքը երկու երկրների ավիաընկերությունների համար։
Այդուհանդերձ, 90-ականների սկզբից, Լեռնային Ղարաբաղի հակամարտության պատճառով, ադրբեջանական ավիափոխադրողները չէին օգտվում հայկական օդային տարածքից, իսկ հայերը՝ ադրբեջանականից։
