Ընդդիմադիր պատգամավորների կողմից Սահմանադրական դատարան դիմելու փաստը հիմք չէ, որ Հայաստանում համայնքների խոշորացման գործընթացը չշարունակվի: Այս մասին ասաց «Քաղաքացիական պայմանագիր» խմբակցության պատգամավոր Հերիքնազ Տիգրանյանը խորհրդարանական ճեպազրույցում:
«ՍԴ դիմելու փաստը հիմք չէ, որ խոշորացման պրոցեսը չշարունակվի, չընթանա, դրանով գործընթացը չի կասեցվում: Խոշորացումն ուղղակիորեն և անուղղակիորեն կապված է նաև տվյալ համայնքների ընտրական պրոցեսների հետ: Կարծում եմ, որ գործընթացներն իրենց բնականոն հունով կգնան, մինչև ՍԴ-ն կկայացնի իր որոշումը»,- ասաց Տիգրանյանն ու նշեց՝ վստահ է, թե ՍԴ-ն ինչ որոշում կկայացնի:
Նա հիշեցրեց՝ խոշորացման գործընթացը նոր չէ, որ ՀՀ-ում սկսվել է՝ նկատելով, որ այդ գործընթացի սահմանադրականությունը երբևէ չի վիճարկվել: «Այդ նույն գործընթացները շարունակվում են, ուղղակի գործընթացները հասցվում են իրենց տրամաբանական ավարտին»,- ասաց պատգամավորը:
Ազգային ժողովը սեպտեմբերի 24-ին ընդունել է համայնքների խոշորացման մասին նախագիծը: Դրանով նախատեսվում է Հայաստանի 441 համայնքներ միավորել 37 համայնքային փնջերում: Հոկտեմբերի 7-ին կառավարության նիստում վարչապետ Նիկոլ Փաշինյանը հայտնել էր, որ հոկտեմբերի 6-ին կառավարությունը գրավոր կարգով ընդունել է ՏԻՄ ընտրություններ նշանակելու վերաբերյալ որոշում: ՀՀ ազգային ժողովի «Հայաստան» և «Պատիվ ունեմ» խմբակցությունների պատգամավորները դիմել են Սահմանադրական դատարան՝ վիճարկելով համայնքների խոշորացման օրենսդրական փաթեթի սահմանադրականությունը:
