«Արմենիա» ավիաընկերության Երևան-Մոսկվա-Երևան չվերթը, որը ծրագրված էր հոկտեմբերի 8-ին ժամը 08:20-ին, չեղարկվել է: «Արմենիա» ավիաընկերությունն այս առիթով պարզաբանում է տարածել:
«Այսօր 08:20 ծրագրված Երևան-Շերեմետևո-Երևան NGT 932/931 չվերթի չեղարկման մասով պարզաբանում ենք, որ նախքան չվերթի իրականացումը, օդանավի անձնակազմը նախաչվերթային ստուգման ընթացակարգերի ընթացքում հայտնաբերել է տեխնիկական խնդիր: Եվ անվտանգության նկատառումներից ելնելով օդանավի հրամանատարը որոշում է կայացրել չիրականացնել չվերթը՝ առաջնորդվելով բացառապես իր և տեխնիկական անձնակազմի մասնագիտական եզրակացություններով»,-հայտնել են ավիաընկերությունից:
Տվյալ չվերթով դեպի Մոսկվա և հակառակ ուղղությամբ պետք է ուղևորվեին 240 ուղևոր:
Ավիաընկերությունից նշել են, որ 110 ուղևորի ավիատոմս արդեն իսկ փոխվել է հաջորդ չվերթների ավիատոմսով: 86 ուղևորի համար գնվել է այլ ավիաընկերությունների չվերթների ավիատոմս:15 ուղևորի վերադարձվել է ավիատոմսի գումարը։29 ուղևորների հետ ավիաընկերության աշխատակիցները շարունակում են լինել կապի մեջ՝ սպասելով ուղևորների վերջնական որոշմանը:
Միևնույն ժամանակ ավիաընկերությունից վստահեցրել են, որ չվերթի հետ կապված բոլոր լրացուցիչ ծախսերը՝ COVID 19 թեսթի հանձնում, հյուրանոցի ապահովում և տրանսպորտային բոլոր ծախսերը հոգացել և հոգում են իրենք:
