Պուտինն ուղերձ է հղել հայ-ռուսական ֆորումի բացման կապակցությամբ

Ռուսաստանի նախագահ Վլադիմիր Պուտինը ողջույնի ուղերձ է հղել ռուս-հայկական ութերորդ միջտարածաշրջանային ֆորումի մասնակիցներին, որում, մասնավորապես, ասվում է.

«Մեր պետությունների միջև հաստատվել է բովանդակալից քաղաքական երկխոսություն և տարբեր ոլորտներում արդյունավետ համագործակցություն:

Միջտարածաշրջանային համագործակցությունը շատ էական դեր է խաղում ռուս-հայկական կապերի զարգացման գործում, ինչը հնարավորություն է տալիս իրականացնել փոխշահավետ ծրագրեր տնտեսական, սոցիալական, ենթակառուցվածքային, հումանիտար և շատ այլ ոլորտներում:

Կարևոր է, որ ֆորումի շրջանակներում մեր երկրների կենտրոնական և տեղական իշխանությունների, հասարակական կազմակերպությունների, գիտական, փորձագիտական և գործարար շրջանակների ներկայացուցիչները կարողանան փորձի փոխանակում կատարել, երկկողմ օրակարգի հարցերի լայն շրջանակ քննարկել և ուղիներ նախանշել հետագա համատեղ աշխատանքի համար»:

ՌԴ նախագահը հույս է հայտնել, որ համաժողովը կանցնի ստեղծագործական, կառուցողական ձևով, կ նոր նախաձեռնությունների սկիզբ կլինի, «ինչը կնպաստի ռուս-հայկական արդյունավետ գործընկերության ամրապնդմանը, ինչպես նաև ինտեգրացիոն գործընթացների խթանմանը Եվրասիական տարածքում»:

Գիշեցնենք, այսօր՝ հոկտեմբերի 18-ին, Երևանում իր աշխատանքն է սկսել ռուս-հայկական ութերորդ միջտարածաշրջանային ֆորումը, որը կտևի 2 օր:

Ֆորումի կազմակերպիչներն են ՌԴ տնտեսական զարգացման նախարարությունը և ՀՀ տարածքային կառավարման և ենթակառուցվածքների նախարարությունը:

Լիագումար նիստին կմասնակցեն Ռուսաստանի տնտեսական զարգացման նախարար Մաքսիմ Ռեշետնիկովը և Հայաստանի տարածքային զարգացման և ենթակառուցվածքների նախարար Գնել Սանոսյանը: Նաև, ֆորումի շրջանակներում տեղի կունենա Ռուսաստանի արտահանման կենտրոնի գործարար առաքելությունը`շուրջ 150 ռուս և հայ ձեռներեցների մասնակցությամբ:

Ֆորումի շրջանակներում կանցկացվեն նաև կլոր սեղանների շարք`տնտեսության, արդյունաբերության, կրթության և մշակութային և պատմական զբոսաշրջության բնագավառում ռուս-հայկական համագործակցության զարգացման վերաբերյալ:

Զուգահեռ նիստերին հրավիրված են մասնակցելու Ռուսաստանի և Հայաստանի մարզերի ղեկավարներ, համապատասխան նախարարությունների և գերատեսչությունների, Եվրասիական տնտեսական միության, գործադիր և օրենսդիր մարմինների, հասարակական կազմակերպությունների, գործարար և փորձագիտական համայնքների ներկայացուցիչներ: Ֆորումի մասնակիցները հատուկ ուշադրություն կդարձնեն Ռուսաստանի և Հայաստանի բնակչության բարեկեցությունը բարելավելու նպատակով առևտրային և ներդրումային համագործակցության ակտիվացման համատեղ միջոցառումներին:

Բացի այդ, նախատեսվում է քննարկել լուծումներ ՝ ուղղված բիզնես վարելու համար բարենպաստ պայմանների ստեղծմանը և կորոնավիրուսային համաճարակի ֆոնին անկումից հետո երկու երկրների տնտեսական աճի արագացմանը:

Թիվ 1