Թիվ 1 Ստուդիայում հյուրընկալվել է «Արդար Հայաստան» կուսակցության նախագահ Նորայր Նորիկյանը։ Զրույցի ընթացքում պարոն Նորիկյանը նշեց, որ Վանո Սիրադեղյանը Ղարաբաղյան շարժման ամենակարկառուն դեմքերից է եղել, «Ղարաբաղ» կոմիտեի անդամ, այնուհետև պատասխանատու պաշտոններ է զբաղեցրել։
«Մենք մարդուն կենդանության օրոք չենք հարգում, չենք գնահատում, նրա վաստակին ուշադրություն չենք դարձնում․ սա, ցավոք սրտի, մեր ամենաողբերգական էլեմենտներից մեկն է․ մեռնում են, նոր սկսում ենք հիշել մարդու վստակը, անցած գործունեությունը։ Արդյո՞ք 20 տարիների ընթացքում մենք չգտանք ձևը՝ Վանոյի խնդրին իրավական լուծում տալու»,- հավելեց պարոն Նորիկյանը։
ՏԻՄ ընտրությունների վերաբերյալ նա նշեց․ « Այս ընտրությունները ցույց տվեցին, որ մեր քաղաքական համակարգը և ՏԻՄ համակարգը, ինչպես նաև ՏԻՄ համակարգի ձևավորման ընթացակարգը չեն համապատասխանում հանրային տրամադրություններին, այլ ավելին՝ մենք ապրում ենք կեղծ քաղաքական համակարգում, որի արդյունավետությունը շատ կարճ ժամանակ հետո ցույց է տալու իր սնանկությունը։ Ակնհայտ է, որ «Հայաստան» դաշինքի «հաջողությունը» պայմանավորված է գործող իշխանության թողտվության, երբեմն նաև անգործության հետևանքով»։
