Կարևորելով սահմանամերձ համայնքների բնակիչների զբաղվածության ու կայուն եկամտի ստեղծման ապահովումն՝ Աշխատանքի և սոցիալական հարցերի նախարարության ու ՄԱԿ-ի Զարգացման ծրագրի հայաստանյան գրասենյակի համագործակցությամբ հոկտեմբերի 1-ից իրականացվում է զբաղվածության ևս մեկ ծրագիր։ Ըստ այդմ՝ Վայոց ձորի, Գեղարքունիքի և Սյունիքի մարզերի սահմանամերձ համայնքներում բնակվող շուրջ 135 շահառու ընդգրկվել է եռամսյա աշխատանքային պրակտիկայի ծրագրում։
Առաջնահերթությունը տրվել է գործազուրկ կանանց և նորավարտ երիտասարդներին, որոնք առաջին անգամ են մուտք գործում աշխատաշուկա: Միջոցառման նպատակն է մեղմել ճգնաժամի բացասական հետևանքները, բարելավել սահմանամերձ համայնքների բնակիչների կենսամակարդակը և զարգացնել նրանց մասնագիտական հմտությունները։
Նախագիծն իրականացվում է «Վայոց Ձորի, Գեղարքունիքի և Սյունիքի մարզերի սահմանամերձ համայնքների դիմակայության ամրապնդում» ծրագրի երրորդ փուլի շրջանակում՝ Միացյալ Թագավորության «Հակամարտությունների, կայունության և անվտանգության հիմնադրամի» ֆինանսավորմամբ:
