ՀՀ ազգային ժողովի ՔՊ խմբակցության պատգամավոր Խաչատուր Սուքիասյանի գնահատմամբ՝ քաղաքակիրթ աշխարհի հետ ոչ մի կոմունիկացիա չի ստացվում այն օրերին, որոնք հանգստյան են Հայաստանում, այսպիսով պատգամավորը կողմ է Ամանորին ոչ աշխատանքային օրերը կրճատելու նախագծին: Սուքիասյանը նման տեսակետ հայտնեց ԱԺ-ում «Հայաստանի Հանրապետության տոների եւ հիշատակի օրերի մասին» Հայաստանի Հանրապետության օրենքում փոփոխություններ կատարելու մասին օրենքի նախագծի քննարկմանը:
«Քաղաքակիրթ աշխարհի հետ ոչ մի կոմունիկացիա չի ստացվում այս օրերին, որոնք հանգստի օր են եղել Հայաստանում: Մենք դրանով շատ մեծ կորուստներ ենք ունենում»,-ասաց Խաչատուր Սուքիասյանը:
Ըստ Սուքիասյանի՝ օրենքի ընդունումից անմիջապես հետո արդյունք չի լինի, դա կզգացվի տարիների ընթացքում: «Կրթված մարդիկ, որոնք հասկանում են տնտեսագիտությունից, պատկերացում են բիզնեսը, արտաքին աշխարհը, սոցիալական խնդիրը, շատ վատ պատկերացում են ունենալու այսօրվա ԱԺ-ի մեր քննարկումներից: Մարդը 1-2 օր մնում է տանը, չգիտի, ինչ անի: 7 օրով մնում էին տանը, ոչ մի համակարգ չէր գործում»,-ասաց պատգամավորը:
ՔՊ-ից Վաղարշակ Հակոբյանն էլ ասաց. «Ես համոզված եմ, որ մեր քաղաքացիների մեծ մասը կողմ կլինի այս մշակութային փոփոխությանը ու հնարավորությանն՝ ավելի շատ աշխատելու»
Ըստ նրա՝ կան ոլորտներ, օրինակ բանկային ոլորտը, առողջապահական ոլորտը, որոնցում 7-8 օր հանգիստը խնդիր է առաջացնում:
Բայց, այնուամենայնիվ, պատգամավորը մտահոգություն ևս հայտնեց, որոնք բարձրաձայնել են տարբեր մարդիկ: «Դա վերաբերում է հյուրանոցային բիզնեսին: Կարծում եմ՝ կգտնվի այնպիսի դրույթ, որը կհիմնավորի, որ այս օրերն աշխատանքային դարձնելը էական վատթարացում չի բերի տուրիստական գոտիների բիզնեսին: Բայց ես առաջարկում եմ սրա մասին շատ խոսել ու հիմնավորումներն ավելի պատշաճ ներկայացնել, որպեսզի այս լավ օրենքը հասու լինի ՀՀ քաղաքացիներին»,-ասաց պատգամավորը:
Նախագծով առաջարկվում է աշխատանքային դարձնել հունվարի 2-5-ը և 7-ը:
