«ՏԻՄ ընտրությունները մի յուրատեսակ ինդիկատոր են մեր համար։ Մենք պարզեցինք, որ մեր տարբեր ընդդիմադիր գործընկերներ պատրաստ են հայտարարություններ անել անվտանգության վերաբերյալ, սահմանային լարվածության վերաբերյալ, չնայած այդ հայտարարությունների մեջ գրեթե իրականություն չկար՝ փորձելով մեր քաղաքացիներին մանիպուլացնել և որոշակի դիվիդենտներ հավաքել նախընտրական շրջանում, ինչպիսին էր օրինակ՝ Փելասարի վերաբերյալ հայտարարությունը»,-այդ մասին այսօր ԱԺ-ում հայտարարեց «Քաղաքացիական պայմանագիր» խմբակցության պատգամավոր Դավիթ Դանիելյանը, որը նաև գլխավորում է Կապանում «Քաղաքացիական պայմանագիր» կուսակցության ավագանու նախընտրական ցուցակը։
Նա նշեց, որ երբ ընդդիմադիր գործընկերները Երևանից հրապարակումներ են անում, գրառումներ են կատարում նման թեմաների շուրջ, չեն գիտակցում, որ մեր սահմանամերձ գյուղերի բնակիչները, քաղաքի բնակիչները խառնվում են իրար, սկսում են զանգահարել իրենց և հարցնում են, թե ինչո՞ւ են նման գործելաոճով աշխատում։
«Մեր հարգելի գործընկերները նմանատիպ հայտարարություններ էին անում նաև նախընտրական շրջանում, ասելով, որ իբրև թե «Քաղաքացիական պայմանագիր» կուսակցությունը փորձում է Սյունիքում համայնքապետի ընտրություններում իրենց թեկնածուներին տանել հաղթանակի՝ հողային զիջումներ անելու համար։ Հարգելի գործընկերներ, կոչ եմ անում՝ նման հայտարարություններից զերծ մնալ, դա ո՛չ ձեզ է օգնում, ո՛չ մեր քաղաքացիներին, դա միայն մեր քաղաքացիներին խանգարում է, որ իրենց բնականոն աշխատանքով զբաղվեն և բոլորի մոտ լարվածություն է առաջանում»,-ասաց Դավիթ Դանիելյանը։
Խոսելով մեկ այլ կարևոր թեմայի շուրջ, Դավիթ Դանիելյանն ասաց, որ վերջին երեք տարիներին իրենց քաղաքական ուժով ձևավորված կառավարությունը բավականին շատ սուբվենցիներ է իրականացրել տարբեր համայնքներում, և պետք է այդ առումով ընդունեն, որ մի հարցում թերացել են, երբ ճիշտ չեն ներկայացրել քաղաքացիներին իրենց կատարած աշխատանքը և այսօր համայնքներում այդ խնդիրն ունեն, որ քաղաքացիները ճիշտ իրազեկված չեն, թե ինչպիսի աշխատանքներ են իրականացվել Կառավարության հետ համատեղ։
«Այսօր իմ հայրենի քաղաքում՝ Կապանում, շինարարական եռուզեռ է, որոնց մեծ մասը հիմնականում ֆինանսավորել է ՀՀ կառավարությունը, և նման ծրագրերը շատ են»,-ասաց Դավիթ Դանիելյանը։
