Այսօր ԱԺ-Կառավարություն հարցուպատասխանի ժամանակ «Քաղաքացիական պայմանագիր» խմբակցության պատգամավոր Սոնա Ղազարյանը հետաքրքրվեց՝ արդյոք ճիշտ են մամուլում տարածվող այն տեղեկությունները, որ նոյեմբերի 9-ին Հայաստանի և Ադրբեջանի միջև կրկին նոր պայմանագիր է կնքվելու:
Արտաքին գործերի նախարար Արարատ Միրզոյանը հայտնեց՝ որևէ հանդիպում այդպիսի ֆորմատով նախատեսված չէ:
«Մշտապես քննարկվում են տարբեր հանդիպումների առաջարկներ, և, ենթադրաբար, այդպիսի հանդիպումների ընթացքում միգուցե լինի համաձայնեցված որևէ տեքստի հրապարակում: Ուզում եմ ասել, որ փաստաթղթերի ստորագրում, որոնք վերաբերում են դեմարկացիային և դելիմիտացիային, ինչպես նաև կոմունիկացիային, գոյություն չունի: Բայց ցանկանում եմ նշել, որ այդ հանդիպումները մեզ տալիս են հնարավորություն ևս մեկ անգամ հասցեագրելու հետպատերազմյան հումանիտար խնդիրների թնջուկը և առաջին հերթին ռազմագերիների և բռնի պահվող քաղաքացիների անձանց շուտափույթ ազատումը, ինչպես նաև Ադրբեջանի վերահսկողության տակ մնացած տարածքներում մշակութային ժառանգությունների հարցը»,- ասաց նախարարը:
Բացի այդ, ըստ Միրզոյանի, այդ հանդիպումները նպաստում են թուլացնել լարվածությունը տարածաշրջանում և երկարատև կայունություն ապահովելու ուղղությամբ ջանքեր գործադրելուն։
«Նման հանդիպումների առաջարկներ կան, և այդ հանդիպումներից հետո համաձայնեցված տեքստերի հրապարակումներ են լինում»,- ասաց Միրզոյանը։
