«Այս պահին մոբիլիզացված են 27 բժշկական կենտրոններ, որոնք սպասարկում են կորոնավիրուսով վարակվածներին»:
Կառավարության նիստի ժամանակ տեղեկությունը հայտնեց առողջապահության նախարար Անահիտ Ավանեսյանը։
«Այսօրվա դրությամբ ծանր է` 1088, ծայրահեղ ծանր` 307, իսկ թոքային օդափոխության սարքին միացած են 152 քաղաքացի։ Վերակենդանացման բաժանմունքներում ունենք 1500 քաղաքացի, որոնցից 0.5 տոկոսն է պատվաստված»,–ասաց Ավանեսյանը։
Նիկոլ Փաշինյանը անդրադառնալով կորոնովիրուսային իրավիճակին, ասաց՝ ՀՀ-ն չի գնալու լոքդաունի. «Խստացվելու է դիմակներ գրելու կանոնները, և չի բացառվում, որ մենք գնանք համընդհանուր բաց տարածքներում դիմակներ դնելու կանոններին: Երբ կա համընդհանուր դիմակ դնելու պարտադրանք, ավելի լավ է վերահսկում իրականացնել»:
Նիկոլ Փաշինյանը նշեց՝ ցանկանում եմ կիսվել անձնական փորձով. «Բանավեճ կա, թե ինչքանով է պատվաստանյութը էֆեկտիվ կամ ոչ էֆեկտիվ: Ես ցանկանում եմ մեր ընտանիքի օրինակով մի իրավիճակ ներկայացնել: Ես նախկինում ասել էի՝ մեր ընտանիքի անդամներից ավագները, բացի երկու երեխաներից, բոլորս պատվաստվել ենք:
Վերջերս պատահեց այնպես, որ մեր 14 ամյա դուստրը կորոնավիրուսով վարակվեց, ինչի մասին մենք իմացանք 1 շաբաթ անց, և բնականաբար մենք իր հետ ամենօրյա շփում ենք ունեցել, բայց մեզանից ոչ ոք չի վարակվել կորոնավիրուսով, չնայած պատվաստանյութը 100 տոկոսով չի երաշխավորում, որ այլևս չես վարակվի: Ընդ որում, մեր ընտանիքի անդամները բոլոր տարբեր պատվաստանյութերով ենք պատվաստված»,-նշեց վարչապետը:
