«Մենք գործ ունենք արհեստական աղմուկի հետ, որոնք հիմնականում բարձրացնում են այն մարդիկ, որոնք անբարեխիղճ լրատվությամբ են զբաղվում»,- այսօր՝ հոկտեմբերի 29-ին, լրագրողների հետ խորհրդարանական ճեպազրույցների ընթացքում նշեց ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանը՝ պատասխանելով ԶԼՄ-ների մասին օրենքում կատարված փոփոխություններին առնչվող լրագրողի հարցին:
Ինչ վերաբերում է ՄԻՊ-ի դիմումին ՍԴ, ապա նա նշեց, որ այստեղ գործ ունենք իրավական գործընթացի հետ. «Պետք է սպասենք ավարտին»:
«Ժողովրդավարությունը Հայաստանում պաշտպանության կարիք ունի, որովհետև մենք գործ ունենք ռևանշիստական ուժերի հետ, որոնք հարվածի տակ են դնում ժողովրդավարական ինստիտուտները մեր երկրում: Մեր նպատակն է՝ պաշտպանելով լրագրությունը, պաշտպանելով խոսքի ազատությունը՝ պաշտպանել ժողովրդավարությունը: Մենք շարունակելու ենք ժողովրդավարության, խոսքի ազատության, լրագրողների պաշտպանության մեր առաքելությունը»,- ասաց Արթուր Հովհաննիսյանը և հավելեց, որ բոլոր կարգավորումները քննարկում են նաև միջազգային գործընկերների հետ:
