Կորոնավիրուսային հիվանդությամբ պայմանավորված մեր երկրում գնալով աճուն են վիրուսով հաստատված դեպքերն ու դրա հետևանքով մահացության թվերը: Աճել են նաև վիրուսով վարակված դեպքերը փոքրիկների մոտ:
«Մուրացան» համալսարանական հիվանդանոցում այս պահին հոսպիտալացված է 17 կորոնավիրուսով հիվանդ երեխա։ Փոքրիկներից 2-ի վիճակը գնահատվում է ծայրահեղ ծանր, նրանք գտնվում են վերակենդանացման բաժանմունքում: 6 երեխայի վիճակը գնահատվում է ծանր, նրանք էլ գտնվում են թթվածնակախյալ վիճակում: 9 երեխայի վիճակը կայուն ծանր է։
Այս մասին ֆեսբուքյան իր էջում հայտնում է ԵՊԲՀ ռեկտոր Արմեն Մուրադյանը: Նա նշել է, որ 17 երեխաներից 15-ի մայրերի մոտ ևս հաստատվել է կորոնավիրուսային հիվանդությունը:
Այսօր նաև հայնտի դարձավ, որ «Մուրացան» համալսարանական հիվանդանոցի նորածնային վերակենդանացման բաժանմունքում մեկ ամսական երեխայի մոտ առավոտյան գրանցվել է կենսաբանական մահ: Ինչպես Հայկական Ժամանակին հայտնել էր ԵՊԲՀ աշխատակազմի ղեկավար Շուշան Դանիելյանը երեխայի մահվանը նպաստել է կորոնավիրուսային հիվանդությունը. «Եթե չլիներ քովիդը, հնարավոր է դեռ ապրեր երեխան»,- ասել էր նա:
Նախորդ շաբաթվա տվյալներով՝ Հայաստանում, եթե երեխաների մոտ քովիդով վարակվածության դրական դեպքերը կազմում էին 4 տոկոս, այժմ 7 տոկոսից ավելի են: Հոկտեմբերի 27-ի տվյալներով՝ վիրուսով վարակված 70 երեխա է բուժում ստանում: 100 տոկոս դեպքերը բաժին են ընկնում «դելտա» շտամին:
