«Վեթինգը կամ դատական բարեփոխումների թեման ակտուալ է: Եվ այդ իսկ պատճառով մենք փորձել ենք այսօր մի սեղանի շուրջ հավաքել այսքան տարբեր բնագավառներում գործող մեր մասնագետներին և 3 տարի չարչրկված այդ թեման, թե ոնց, թե ինչպես, թե երբ պետք է վեթինգ լինի Հայաստանում: Հուսով եմ, այդ քննարկմանը կդրվի վերջակետ»,- այս մասին «Դատական բարեփոխումների ընթացքը հետհեղափոխական և հետընտրական Հայաստանում» թեմայով քննարկման ժամանակ նշեց ՀՀ արդարադատության նախարար Կարեն Անդրեասյանը:
«Պրոբլեմը, գոնե իմ համոզմամբ, եղել է այն, որ մասնագետների մի խումբը գտնում է, որ ներկայիս Սահմանադարությունը թույլ է տալիս իրականացնել վեթինգ առանձին օրենքով, առանձին մեխանիզմով, իսկ մասնագետների մեկ այլ խումբ գտնում է, որ դա ներկայիս Սահմանադրությամբ անհնար է»,- ասաց Անդրեասյանը և հավելեց` տարբեր բնագավառներում մասնագետների հետ իրականացվող քննարկումների արդյունքում ընդհանուր պատկեր կառաջանա. Եվ հանրությանը հանգիստ խղճով կկարողանանք ասել՝ ի վերջո վեթինգ լինելու է Սահմանադրության բարեփոխումներից առաջ, թե հետո:
Միևնույն ժամանակ, Անդրեասյանն ընդգծեց, որ վեթինգն արդեն սկսվել է. «Վեթինգը սկսվել է ԲԴԽ այսօրվա կազմի բացարձակ օբյեկտիվ աշխատանքի շնորհիվ»:
