ՀՀ Էկոնոմիկայի նախարար Վահան Քերոբյանն Ազգային ժողովում լրագրողների հետ ճեպազրույցի ընթացքում պատասխանեց հարցին՝ Մայր Աթոռի՝ Ազգային ժողով դիմելու եւ հունվարի 5-ը եւ 7-ը ոչ աշխատանքային դարձնելու մասին։
«Ստիպված եմ կրկնել, որ ես Հայ Առաքելական եկեղեցու հետեւորդ եմ, զավակ եմ։ Երբ մենք խոսում ենք պետության եւ կառավորության մասին, գիտեք, որ եկեղեցին ու պետությունը անջատ են գործում։ Իհարկե, մենք հաշվի ենք առնում այն ցանկությունները, որոնք կան։ Պետք է զարմանք հայտնեմ, որ Մայր Աթոռը չի առաջարկել, օրինակ, ամսի 31-ը եւ 1-ը չնշել, որովհետեւ դրանք բացարձակ եկեղեցական տոներ չեն»,- ասաց Քերոբյանը։
Նախարարի խոսքով, եթե մի կողմից Մայր Աթոռը առաջարկում է ավելացնել եկեղեցական հանգստյան օրերի քանակը, մյուս կողմից՝ նա կարող է օգնել կառավարությանը եւ առաջարկել չնշել 31-ը եւ 1-ը, որոնք որեւէ հոգեւոր նշանակություն չունեցող տոներ են։
«Այն կարեւորագույն հոգեւոր տոները, որոնք պետք է ընդգրկվեն ոչ աշխատանքային օրերի ցանկում, ընդգրկված են՝ դա Սուրբ ծնունդն է, Զատիկը», – եզրափակեց Վահան Քերոբյանը։
