Վերջին ՏԻՄ ընտրություններին Գորիսի համայնքի ղեկավարի պաշտոնում ընտրված Առուշ Առուշանյանը հայտնում է, որ ընդգրկված լինելով «Հայաստան» դաշինքի ընտրական ցուցակում, այսօր մանդատից հրաժարվելու դիմում է ներկայացրել։
Տարածած հայտարարության մեջ, պարզաբանելով իր կայացրած որոշումը, Առուշանյանը նշել է, որ նման որոշում է կայացրել այն պատճառով, որ ոչ միայն չի տեսնում իրեն օրենսդիրում, այլև ցանկանում է ապրել ու աշխատել Գորիս համայնքում:
Հիշեցնենք, ԱԺ պատգամավոր, «Հայաստան» խմբակցության անդամ Դավիթ Սեդրակյանը մանդատից հրաժարվել էր: Խմբակցությունում Սեդրակյանից հետո, ըստ ցուցակի, հաջորդը պատգամավորական մանդատը պետք է ստանար Առուշ Առուշանյանը, որը հիմա կալանավորված է:
Նրա հայրը լրատվամիջոցներին ավելի վաղ արդեն հայտնել էր, որ վերջինս չի պատրաստվում մանդատը վերցնել:
Գորիսի քաղաքապետ Առուշ Առուշանյանը կալանավորված է հուլիսի 16-ից:
Ըստ ՀՔԾ-ի՝ Գորիսի քաղաքապետը մեղադրվում է ՀՀ ՔՕ 35-154 հոդվածի 4-րդ մասի 2-րդ կետով (քվեարկության գաղտնիությունը խախտելը նախապատրաստելը), ՀՀ ՔՕ 38-149 հոդվածի 2-րդ մասի 4-րդ կետով (ընտրական իրավունքի իրականացմանը խոչընդոտելը, կազմակերպելը կամ օժանդակելը, որը կատարվել է պաշտոնեական դիրքը օգտագործելով), ՀՀ ՔՕ 38-154 հոդվածով (քվեարկության գաղտնիությունը խախտելը կազմակերպելը կամ օժանդակելը):Առուշանյանը փոխկապակցված է Քարահունջի համայնքապետի հետ առնչվող գործին:
Հիշեցնենք նաև, որ Առուշանյանի գլխավորած «Առուշ Առուշանյան» դաշինքը հոկտեմբերի 17-ին Գորիսում կայացած ՏԻՄ ընտրություններում հաղթանակ է տարել:
