«Մանվել Փարամազյանի վերաբերյալ կան երկու քրեական գործեր, և մենք գտնում ենք, որ այդ երկու քրեական գործերը պետք է միացնել մեկ վարույթում՝ նկատի ունենալով այն հանգամանքը, որ ենթադրյալ մեկ անձի կողմից կատարված մի քանի հանցագործությունների վերաբերյալ գործեր են, իսկ Քրեական դատավարության օրենսգրքի 25-րդ հոդվածի համաձայն՝ դատարանի կողմից մեկ վարույթում կարող են միացվել մեկ կամ մի քանի հանցագործությունների կատարման մեջ մեղադրվող մի քանի անձանց կամ մի անձի կողմից կատարված մի քանի հանցագործությունների կատարման վերաբերյալ գործերը»,- միջնորդությամբ հանդես եկավ Մանվել Փարամազյանի պաշտպան տիկին Սահակյանը:
Պաշտպանի խոսքով՝ հնարավոր չէ պատկերացնել, որ մեկ անձի վերաբերյալ երկու տարբեր գործեր քննվեն, ուստի նա կարծում է, որ այդ գործերը պետք է միացվեն մեկ վարույթում:
Դատախազը, ներկայացնելով իր դիրքորոշումը, նշեց, որ ինքը նշված մյուս գործի նյութերին ծանոթ չէ. «Հետևաբար օբյեկտիվորեն զրկված եմ հնարավորությունից՝ գնահատելու և հակակշռելու մի կողմից՝ գործերի ողջամիտ քննության առումով, մյուս կողմից՝ դատավարության: Ուստի թողնում եմ դատարանի հայեցողությանը»:
Դատավորը նշեց, որ այդ գործերը կարող են մեկ վարույթում քննվել, եթե նրանց փաստական հանգամանքներով պայմանավորված՝ առկա է բազմակողմանի, լրիվ և օբյեկտիվ քննություն ապահովելու անհրաժեշտություն: Փաստաբանը հակադարձեց՝ ասելով, որ այդ նորմում կան բացեր, և հավելեց, որ Մանվել Փարամազյանի առողջական վիճակը թույլ չի տալիս, որ անընդհատ տեղափոխման խնդիրներ լինեն. «Այսինքն՝ պետության շահերից է նաև բխում, որ միավորվեն գործերը»:
«Դատարանը, լսելով կողմերի կարծիքը, ղեկավարվելով ՀՀ Քրեական դատավարության օրենսգրքի 41-րդ, 10-րդ, 18-րդ, 312-ր հոդվածներով՝ որոշել է միջնորդությունը մերժել»,- հայտարարեց դատավորը:
Դատական նիստն ընդմիջվեց հիմնավորմամբ, որ մեկ այլ դատական նիստ կա Մանվել Փարամազյանի մասնակցությամբ։ Նաև՝ նկատի ունենալով, որ դրանով միջնորդություններ կան, որոնց քննությունը կարող է որոշակի ժամանակ պահանջել։
Դատական հաջորդ նիստը նշանակվեց դեկտեմբերի 13-ին ժամը 14-ին։
Նշենք, որ այս գործով Քաջարան համայնքի ղեկավարին մեղադրանք է առաջադրվել՝ ՀՀ քրեական օրենսգրքի 131-րդ հոդվածի (Մարդուն առևանգելը) 2-րդ մասի 1-ին կետով:
Մյուս գործով Փարամազյանին մեղադրանք է առաջադրվել քրեական օրենսգրքի 38-178-րդ հոդվածի 3-րդ մասով (խարդախությունը), 311-րդ հոդվածի 4-րդ մասով (կաշառք ստանալը) և 154.2-րդ հոդվածի 2-րդ մասով (ընտրողի կամքի ազատ իրականացմանը խոչընդոտելը)։
Մանվել Փարամազյանն այժմ կալանքի տակ է։
