ՀՀ կառավարության այսօրվա նիստին Նիկոլ Փաշինյանն անդրադարձավ երկրում առկա թափուր աշխատատեղերին:
Կառավարության ղեկավարն ընդգծեց՝ բիզնեսից ամենահաճախ ստացվող ահազանգն աշխատուժի խնդիրն է.
«Հայաստանում արձանագրված հազարավոր թափուր աշխատատեղեր կան: Շինարարության ոլորտում մենք նույնպես ունենք պրոբլեմ։ Ամենահաճախ ահազանգը բիզնես ոլորտից ստացվող աշխատուժի խնդիրն է։ Սկսած շինարարության ոլորտից եւ ավարտած բարձր տեխնոլոգիաների ոլորտով՝ ամենուր մենք աշխատատեղերի խնդիր ունենք։ Այս հարցը պետք է ունենանք մեր աչքի առաջ եւ զբաղվենք այդ խնդիրների լուծմամբ»,- նշեց Փաշինյանը։
ՀՀ տարածքային կառավարման և ենթակառուցվածքների նախարար Գնել Սանոսյանն էլ սուբվենցիոն ծրագրերի քննարկման ժամանակ ասաց, որ բազմաթիվ համայնքներում աշխատողների պակասի խնդիր ունեն։
«Մեր շինարարները բավական մեծ քանակով մրցույթներ են շահել, բայց աշխատողների խնդիր ունեն, որ ավելի արագ տեմպերով աշխատանքներն իրականացնեն»,- նշեց նախարարը։
