Մտադրություն չունեմ թողնել պաշտոնս:
Այս մասին այսօր ՀՀ կառավարության նիստից հետո հայտարարեց առողջապահության նախարար Անահիտ Ավանեսյանը՝ պատասխանելով լրագրողների հարցերին, թե ճի՞շտ են արդյոք մամուլում շրջանառվող տեղեկություններ, ըստ որոնց՝ Կառավարությունը պատրաստվում է նախարարին փոխարինող գտնել։
«Օդից վերցրած լուրերը մշտապես պտտվում են բոլոր նախարարների հետ կապված: Ես որևէ մտադրություն չունեմ թողնելու իմ պաշտոնը, շարունակելու եմ պաշտոնավարել այնքան ժամանակ, որքան ինձ կվստահվի դա»,- ասաց նա՝ շեշտելով՝ առողջապահության նախարարությունը և բժշկական կենտրոնները կատարում են ահռելի աշխատանք։
Նախարարը անդրադարձավ նաև Արսեն Թորոսյանի՝ արդեն պարբերաբար դարձած գրառումներին՝ մարզերում իրականացվող առողջապահական աշխատանքների վերաբերյալ, որտեղ նախարարը չի ուղեկցում Թորոսյանին։
Ըստ Ավանեսյանի՝ Թորոսյանը, լինելով պատգամավոր, ակտիվ լուսաբանում է 2021 թվականին արվող լայնածավալ կապիտալ շինարարությունները: Արդեն 6 բժշկական կենտրոններ ակտիվ շինարարության փուլի մեջ են: Աշխատանքները ԱՆ-ի կողմից շարունակական են լինելու։
«Հաջորդ տարի ընդգրկելու ենք կարևոր նկատառում՝ պոլիկլինիկական կառույցների շենքային պայմանները լավացնելու։ Գերզբաղված լինելով կորոնավիրուսի դեմ պայքարով և պատվաստումների գործընթացը խթանելով՝ պարոն Թորոսյանը լրացնում է լուսաբանման այդ հատվածը»։
Նախարարը հավելեց, որ բարձր գնահատականը առողջապահության նախկին նախարար Արսեն Թորոսյանի նկատմամբ շարունակական է։
