Flyone Armenia ընկերությունը նախատեսել է չվերթները մեկնարկել այս տարվա նոյեմբերի վերջին կամ դեկտեմբերի սկզբին։ Սկզբնական շրջանում ուղղությունները լինելու են Ռուսաստանը (օրական մեկ չվերթ դեպի Մոսկվա), Իրանը (շաբաթական երեք չվերթ դեպի Թեհրան): Պլանավորում են այս տարի չվերթ ունենալ նաև դեպի Լիոն։
Ավիաշուկայի նոր մասնակիցը նշում է, որ ավիատոմսերի գինը սկսելու է 39 եվրոյից։ Առաջիկայում այդ մասին կլինեն մանրամասներ, իսկ թե քանի ինքնաթիռով կսկսեն աշխատանքը Flyone Armenia ընկերության գլխավոր տնօրեն Միրչա Մալեկան նշեց․
-Քանի որ ձմեռային սեզոնը հոսքերի առումով համեմատաբար թույլ է համարվում, այս տարի մենք նախատեսում ենք սկսել երկու ինքնաթիռով չվերթներ, հաջորդ տարի հաստատ կլինի երրորդ ինքնաթիռը, գուցե նաև՝ չորրորդը։ Սրանք կարճաժամկետ պլաններ են, որ նախատեսում ենք կյանքի կոչել 2022 թվականին։
Flyone Armenia ընկերության գլխավոր տնօրենը հայտնեց, որ հայկական շուկան վերլուծել են դեռ նախորդ տարվա օգոստոսից։ Նա անդրադարձավ նաև ընկերության պլանավորված նոր ուղղություններին․
Հայկական ավիաշուկայի ներկայիս հոսքերն ուսումնասիրելով կարծում ենք, որ այս նախագիծը կոմերցիոն տեսանկյունից իրատեսական է և այն պետք է մեզ ոչ միայն եկամուտ ապահովի որպես ավիաընկերություն, այլ նաև շահավետ լինի ուղևորների համար։
Նախ դա նոր ուղղություններ կտա Հայաստանին։ Մենք պլանավորում ենք ամռանը բացել նոր ուղղություններ՝ ինչպիսիք են Թելավիվը, Բարսելոնան, մի քանի ուղղություններ դեպի Գերմանիա, պլանավորում ենք նաև դեպի Հունաստան՝ մի քանի քաղաքի հնարավորությամբ, պլանների մեջ է նաև Չեռնոգորիան, կարծում ենք դա հնարավորություն կտա ուղևորին ճանապարհորդել շատ ավելի արագ, շատ ավելի հարմարավետ, շահավետ գներով, և ամենակարևորը՝ ապահով։
