Ազգային ժողովի նախագահ Ալեն Սիմոնյանն այսօր խորհրդարանում լրագրողների հետ զրույցում խոսել է պատերազմի ավարտի մեկ տարվա մասին։
«Սա մեզ համար ևս մեկ հնարավորություն է վերաիմաստավորել և գնալ առաջ՝ արդեն մեր սխալների վրա սովորելուց հետո։ Մատերի արանքով չենք կարող նայել այս մեծ ցավին, որովհետև մենք շատ բարձր գին ենք վճարել մեր սխալների համար։Երևի թե ամենաբարձր գինն ենք վճարել, և մենք դեռ շատ երկար պետք է վերհիշենք, հասկանանք։ Այդ առումով շատ կարևորում եմ քննիչ հանձնաժողովի ստեղծման գաղափարը, որը մեր կողմից առաջ քաշվեց և մեր կողմից պետք է ստեղծվի»:
Դիտարկմանը, որ քննիչ հանձնաժողովի ստեղծման մասին խոսվում է արդեն մեկ տարի, Սիմոնյանը նշեց, որ օրենքը թույլ է տալիս 6 ամսով ստեղծել հանձնաժողով և երկարաձգել ևս 6 ամսով, բացի այդ՝ ոչ բոլոր պատգամավորներն են դեռ ստորագրել գաղտնիության վերաբերյալ փաստաթղթերը։
Նրա խոսքով՝ մենք պետք է երկարատև խաղաղության ճանապարհով գնանք, որպեսզի կարողանանք մեր երկիրը կառուցել:
«Մենք չպետք է պատերազմ հրահրենք ու սկսենք, որովհետև մենք երբևիցե դա չենք արել, նույնիսկ Արցախյան առաջին պատերազմից հետո։ Ես կարող եմ տեսախցիկների առաջ վատ ու ամպագորգոռ հայտարարություններ անել, բայց դրանից այդ կրակոցներն ավելի շուտ շատանալու են, քան քչանալու են»,-ասաց նա:
Հայաստանի և Արցախի օդային տարածքի անվտանգ լինելու վերաբերյալ հարցին էլ ԱԺ նախագահը ուղիղ եթերով չպատասխանեց։ Նա միայն շեշտեց՝ թուրքական «բայրաքթարները», որոնցով Արցախյան 44-օրյա պատերազմի ժամանակ ադրբեջանական կողմը հարվածներ էր հասցնում, առաջին անգամ էին կիրառվում, և հայկական կողմն էլ աշխարհում առաջիններից է եղել, որ դրանք խոցել է։
