Այսօր՝ նոյեմբերի 9-ին, հրավիրվել է ԱԺ պաշտպանության և անվտանգության հարցերի մշտական հանձնաժողովի հերթական նիստը:
Ինչպես նշեց հանձնաժողովի նախագահ Անդրանիկ Քոչարյանը, հանձնաժողովի այսօրվա նիստին մասնակցել է նաև Արծրուն Հովհաննիսյանը՝ փորձագետի կարգավիճակով. «Պարոն Հովհաննիսյանին առաջարկվել է հանձնաժողովի փորձագետի կարգավիճակը, և ինքը սիրով ընդունել է դա: Պարոն Հովհաննիսյանը մեզ օգնելու է շատ-շատ հարցերում, որովհետև ինքը ոչ միայն դասավանդել է, այլև կյանքի փորձ է անցել՝ սկսած զինված ուժերի ակունքներից. ռազմական գիտառազմական»:
Անդրանիկ Քոչարյանն ընդգծեց. «Յուրաքանչյուր մարդ, ով անկեղծ իր ներդրումն է առաջարկել և ձեռք է մեկնել մեր երկրի ապագային միտված գործողություններում, պետք է մեր հանձնաժողովի կողմից նկատված լինի՝ անկախ նրանից, թե ինչ շահարկումների միջով են փորձում անցկացնել: Շահարկումներն ու ֆեյքերը պետք է մի օր վերանան մեր կյանքից, և իրական գործընթացների մեջ իրական մարդը պետք է իր գիտելիքները ծառայեցնի մեր երկրի կարիքների համար»:
Հանձնաժողովի նախագահը շնորհակալություն հայտնեց Արծրուն Հովհաննիսյանին ներկա գտնվելու համար. «Առավել ևս, որ քննիչ հանձնաժողովը օր օրի մոտենում է իր ձևավորման վերջնական փուլին, և այնտեղ մեծ, շատ մեծ ճանապարհ պիտի անցնենք միասին: Եվ ակնկալում եմ, որ ընդդիմադիր դաշտի մեր գործընկերները կգիտակցեն դրա կարևորությունը, որովհետև դա մի աշխատանք է, որը մնալու է մեր հետևից եկող քաղաքական ուժերի համար»:
