Ադրբեջանական մամուլում իրարանցում է սկսվել այն բանից հետո, որ Արշակ Կարապետյանը այցելել է Արցախ։ Երկրի պաշտպանության նախարարությունը այն որակել է «ռազմաքաղաքական սադրանք»։
«Հայաստանի պաշտպանության նախարարի չարտոնված այցը ադրբեջանական հողեր, հանդիպումներ անօրինական հայկական կազմավորումների հետ և նրանց մարտական պատրաստության մասին կարծիք հայտնելը ռազմաքաղաքական սադրանք է։ Հայաստանի պաշտպանության նախարարի այս սադրիչ այցը միտումնավոր իրականացվել է Ադրբեջանի Հանրապետության, Ռուսաստանի Դաշնության նախագահների և Հայաստանի վարչապետի եռակողմ հայտարարության ստորագրման տարեդարձի նախօրեին։
Այսպիսով, Հայաստանի ռազմաքաղաքական ղեկավարությունը, կոպտորեն խախտելով եռակողմ հայտարարության դրույթները, միտումնավոր ապակայունացնում է իրավիճակը տարածաշրջանում և վտանգում ռուս խաղաղապահների գործունեությունը։
Հայաստանի ռազմական ղեկավարությունը 44 օրում ղարաբաղյան երկրորդ պատերազմում կրած տոտալ պարտությունից հետևություններ անելու փոխարեն՝ հարմարվելու տարածաշրջանի նոր աշխարհաքաղաքական իրավիճակին, ամրապնդելու խաղաղությունն ու անվտանգությունը, էժանագին ռազմական արկածախնդրության փորձեր է անում՝ ներքին ակնկալիքով»,- ասվում է նախարարության հաղորդագրության մեջ։
