Ամանորի հանգիստը 2-ի փոխարեն 3 օր կտևի։ ՀՀ կառավարությունն ԱԺ-ում առաջին ընթերցմամբ ընդունվելուց հետո որոշ փոփոխություններ է արել «Տոների ու հիշատակի օրերի մասին» ՀՀ օրենքի նախագծում։
Այս մասին այսօր ԱԺ պետական-իրավական հարցերի մշտական հանձնաժողովի նիստում նախագծի ներկայացման ժամանակ ասաց ՀՀ Էկոնոմիկայի նախարար Վահան Քերոբյանը:
Անդրադառնալով Մայր Աթոռի առաջարկներին՝ նախարարը վստահեցրեց, որ դա ևս մանրամասն քննարկել են:
«Էկոնոմիկայի նախարարությունը նաև շատ կարևորում է պետություն-մասնավոր երկխոսությունը, և նախագիծը քննարկվել է նախարարության ՓՄՁ ենթախորհրդում, բազմաթիվ ասոցիացիաների հետ հանդիպումների ընթացքում: Այնուամենայնիվ, հաշվի առնելով այն փիլիսոփայությունը, որ դրել ենք այս օրենքի փոփոխության մեջ՝ որոշում է կայացվել այսպիսի տարբերակով առաջ գնալ»,- ասաց Քերոբյանը՝ հիշեցնելով, որ հանձնաժողովում առաջարկները պետք է քննարկվեն և քվեարկվեն:
Ընդդիմությունը դեմ քվեարկեց Քերոբյանի ներկայացրած նոր նախագծին, բայց այն ընդունվեց ձայների մեծամասնությամբ ու կներառվի Աժ հերթական քառօրյա նիստերի օրակարգում։
