Այսօր՝ նոյեմբերի 11-ին, կառավարության հերթական նիստում այժմ քննարկվում է 2021թ. պետական բյուջեում փոփոխություն կատարելու մասին որոշման նախագիծը:
«Որոշման նպատակն է Մ2 Երևան-Երասխ-Գորիս-Մեղրի-ԻԻՀ սահման, Մ8 Վանաձոր-Դիլիջան և Վահանավանք հատվածներում միջին նորոգման աշխատանքների իրականացման համար կնքված պայմանագրերի շրջանակներում նախատեսել ֆինանսական միջոցներ:
Դեռևս հունիսին առանց ֆինանսական միջոցներ նախատեսելու հայտարարվել էին մրցույթներ, որոնց արդյունքում ընկերությունների հետ կնքվել են պայմանագրեր, և անհրաժեշտություն է առաջացել նրանց վճարել: Ընդհանուր գումարը կազմում է 482 մլն 302 հազար դրամ»,- նշեց տարածքային կառավարման և ենթակառուցվածքների նախարար Գնել Սանոսյանը:
Արձագանքելով՝ վարչապետ Նիկոլ Փաշինյանը պահանջեց հստակեցնել, թե որ կտորի մասին է խոսքը. «Մենք ասում ենք Վանաձոր-Դիլիջան, բայց դրա մի շատ մեծ կտոր, որը երկար տարիներ շատ վատ վիճակում էր, նախորդ տարի մենք ավարտեցինք: Այս որոշումները կայացնելիս +, – 100 կմ, +3-4 բանաձևերից եկեք խուսափենք, սա հանրային միջոցառում է, կոնկրետ ասեք՝ այսինչ բնակավայրի հատվածից մինչև այսինչ բնակավայրի հատված»:
Վարչապետը նախարարից հետաքրքրվեց նաև, թե տարվա մեջ 500 կմ ճանապարհ կառուցելու հանձնառությունը ի կատար ածվելո՞ւ է առանց սուբվենցիաների, ինչին նախարարը հակիրճ պատասխան տվեց. «Այո»:
