Եվրոպական միության աջակցությամբ ՄԱԿ-ի զարգացման ծրագրի կողմից իրականացվող «Համայնքների ղեկավարները հանուն տնտեսական զարգացման» ծրագիրը էական նշանակություն կունենա համայնքների տեղական կարողությունների զարգացման, տարածաշրջանում ներառական տնտեսական աճի համար:
Ծրագրի երկրորդ փուլի մեկնարկը տրվեց նոյեմբերի 12-ին կազմակերպված միջոցառմամբ:
Ծրագիրը կգործի մինչև 2024 թվականը և Արևելյան գործընկերության երկրներում տեղական կառավարման մարմիններին կխրախուսի զարգացման նորարարական մեթոդներ կիրառել, որոնք արդար մոտեցում կապահովեն բոլորի նկատմամբ՝ միևնույն ժամանակ բարենպաստ ազդեցություն ունենալով շրջակա միջավայրի վրա:
«Այս ծրագիրն օգնելու է ՀՀ համայնքներին՝ համակարգված, համակողմանի ձևով արձագանքել մի շարք բավականին բարդ մարտահրավերների: Աշխատելու ենք միասին Հայաստանում Արևելյան գործընկերության երկրների գործընկերների հետ՝ հատկորոշելու համակողմանի զարգացման խնդիրներ և տեղական գործընկերների հետ համատեղ այդ խնդիրները լուծելու նորարարական ձևով՝ օգտագործելով համակողմանի մոտեցում»,-ասաց Հայաստանում ՄԱԶԾ մշտական ներկայացուցիչ Նաթիա Նացվլիշվիլին:
ՄԱԶԾ-ի կողմից աջակցվող ծրագիրը համակողմանի է: «Մենք տարածուն խորհրդատվական աջակցություն կտրամադրենք, որ համայնքները կարողանան տեսնել խնդրի լուծումը»,-ասաց Նացվլիշվիլին ու հավելեց՝ ինչ-որ հատվածում կլինի նաև ֆինանսական աջակցություն:
ՀՀ տարածքային կառավարման և ենթակառուցվածքների նախարար Գնել Սանոսյանը հիշեցրեց, որ նոյեմբերի 10-ին լրացել է համայնքների կազմավորման 25-ամյակը: «Համայնքների կազմավորումը բավականին հետաքրքիր, բարդ փուլ է եղել: Եվ 25 տարի անց մենք կանգնած ենք մի նոր խոշոր փուլի առջև, դա համայնքների խոշորացման փուլի ավարտն է, բայց մյուս կողմից՝ հասկանում ենք, որ վարչատարածքային բաժանումը երբեք ավարտ չի ունենում: Ե´վ այս ընթացքում, և´ հիմա, և´ առաջիկայում անընդհատ կունենանք տարբեր ծրագրեր, որոնցով կօգնենք, կաջակցենք համայնքներին, դրանց տարբեր գործառույթների, ծառայությունների մատուցման, ապակենտրոնացման և այլ հարցերում: Այս ծրագիրը նորից ուղղված է այդ նպատակին»,- ասաց նախարարը:
Նա հույս հայտնեց, որ միջազգային գործընկերների հետ կկարողանան աջակցել դեկտեմբերի 5-ից ձևավորվելիք 79 համայնքներին: Նախարարը նկատեց՝ ծրագիրը բավականին լայն շրջանակ ունի: «Գլխավոր շեշտադրումը համայնքների ապակենտրոնացմանը, նրանց կարողությունների զարգացմանը գնալն է: Եվ հույս ունենք, որ այս ծրագիրը կլինի մեր այն ծրագրերից մեկը, որն իսկապես այդ ուղղությամբ լրջագույն աշխատանք կտանի գործընկերների աջակցությամբ: Եվ մենք կկարողանանք գնալ համայնքների զարգացման, ապակենտրոնացման»,- ասաց նախարարը:
Հայաստանում Եվրոպական միության դեսպան Անդրեա Վիկտորինը նշեց. «Ծրագրի հիմնական նպատակն է համայնքներին գիտելիք փոխանցել, դրանք տեղափոխել դեպի «կանաչակենտրոն» նորարարական տնտեսական միջավայր, ինչը ենթադրում է, որ դրանք պետք է համագործակցեն տեղական իշխանությունների, քաղհասարակության հետ, բիզնես համայնքի հետ, որպեսզի կարողանանք ստեղծել ավելի լավ տնտեսական միջավայր»:
Ծրագրի առաջին փուլը, ըստ դեսպանի, բավականին հաջողված է: Նա նկատեց՝ Հայաստանում բավականին լուրջ մարտահրավերներ կան, և սա լավ հնարավորություն է տալիս վերլուծել համայնքային զարգացման կարողությունները և համայնքային հաջողությունների հնարավորությունը:
Փոխվարչապետ Սուրեն Պապիկյանը տեսաուղերձով իր ողջույնի խոսքում կարծիք է հայտնել, որ ծրագիրը էական նշանակություն կունենա համայնքների դիմակայունության ամրապնդման, տեղական կարողությունների զարգացման հարցում: «Նշանակալից եմ համարում դրա շրջանակներում տեղական բնույթի տնտեսական զարգացման ծրագրերի մշակումն ու իրացումը՝ նաև ներդրումների ներգրավման տեսանկյունից»,- ասել է Պապիկյանը:
