Այսօր՝ նոյեմբերի 13-ին, արտակարգ դեպք է տեղի ունեցել Արագածոտնի մարզում։ Ժամը 02։00-ից-02։30-ն ընկած ժամանակահատվածում Ագարակավան գյուղի բնակիչները նկատել են գյուղում գայլերի ոհմակ։
Shamshyan.con-ի փոխանցմամբ, գյուղացիները, դուրս գալով տներից, գյուղի 7-րդ փողոցի 1-ին փակուղու բնակիչ՝ 65-մյա Հայկ Մարտիրոսյանի տան բակի տարբեր հատվածներում հայտնաբերել են սատկած գառներ ու ոչխարներ, այդ թվում՝ մայրացու։
Գյուղացիների աղմուկի վրա գայլերը դիմել են փախուստի, որից հետո մինչև լուսաբաց գյուղացիները հայտնաբերել են, որ Հ. Մարտիրոսյանի ընտանիքին պատճառվել է խոշոր չափ նյութական վնաս։
Մեծաթիվ սատկած գառներ ու ոչխարներ գյուղացիները հայտնաբերել են տանից 2-3 կմ հեռավորության վրա՝ դաշտերում։ Քաղաքացին, ում ընտանիքը բազմանդամ է, կրել է մոտ 40 հազար ԱՄն դոլարի վնաս։
Գյուղացիներին հաջողվել է գայլերից մեկին վնասազերծել։
Գայլերի հարձակման հետևանքով սատկել է մոտ 170 գառ ու ոչխար, այդ վթում՝ մայրացու, 37-ից ավելի գառներ չկան, 80-ից ավելի ոչխարներ էլ դարձյալ՝ մայրացու, վիրավոր են։
Գյուղի անասնաբույժը հայտնել է, որ բոլոր վիրավոր ոչխաների ու գառների կոկորդը ծակված է, կատարել են առաջին բուժօգնություն, սակայն նրանք չեն ապրի, քանի որ վնասվածքները շատ են ու լուրջ:
Գյուղապետի տեղակալն էլ նշել է, որ գյուղի մերձակա տարածքներոմ գտել են մոտ 130 սատկած գառ ու ոչխար:
Տուժած ընտանիքը բազմանդամ է, 3 եղբայր վարկ էին վերցրել ու դժվարությամբ սեփական տնտեսությունը ստեղծել, դեկտեմբերին պետք է վաճառեին ոչխարները՝ վարկը փակելու համար:
