ԱՄՆ-ի Կոնգրեսի Ներկայացուցիչների պալատի հետախուզության հարցերով հանձնաժողովի նախագահ Ադամ Շիֆը դատապարտել է Հայաստանի դեմ Ադրբեջանի՝ երեկվանից սանձազերծած գործողությունները:
Անդրադառնալով իրավիճակին, նա գրել է.
«Խորապես անհանգստացած եմ տեղեկություններով այն մասին, որ Ադրբեջանի զինված ուժերը սահմանին հարձակվել են հայ զինվորների վրա: Ընդ որում՝ կան տեղեկություններ զոհերի ու տասնյակից ավելի հայ զինվորների ապօրինաբար գերեվարելու վերաբերյալ:
Այս սանձազերծված հարձակումն Ադրբեջանի ու Հայաստանի միջև հրադադարի մասին համաձայնության ուղղակի խախտում է և վառ վկայություն, որ Միացյալ Նահանգները պետք է անի հնարավորը՝ զսպելու Ադրբեջանի շարունակվող ագրեսիան»:
Կոնգրեսականը կոչ է արել ԱՄՆ պետդեպարտամենտին անհապաղ գործի անցնել՝ օգտագործելու դիվանագիտական յուրաքանչյուր խողովակ ու հնարավոր լծակ՝ կանխելու ևս մեկ զանգվածային հումանիտար աղետ ու ցույց տալու ԱՄՆ աջակցությունը հայ ժողովրդի ինքնիշխանությանը:
