Այսօր՝ նոյեմբերի 17-ին, Ազգային ժողովի հերթական նիստում քննարկվում է ՀՀ 2022 թվականի պետական բյուջեի մասին օրենքի նախագիծը:
«Էնքան զբաղված եմ, որ նույնիսկ երեկ Ֆեյսբուքում գրել էին, որ ես մահամերձ եմ, այդպիսի ստերին չհավատաք, նորից մեռնելուս չհավատաք»,- ընդհատելով «Քաղաքացիական պայմանագիր» խմբակցության պատգամավոր Հովիկ Աղազարյանի հարցը՝ ասաց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը:
Պատգամավորին հետաքրքրում էր ատկատային իրավիճակը բանակում:
Ի պատասխան Անդրանիկ Քոչարյանը նշեց, որ բանակի զինվորական մասից գնումների մասը պետք է հեռացվի. «Զինվորականները պետք է զբաղվեն միայն զինվորական խնդիրներով: Գայթակղիչ է դարձել այն, որ զինվորականները մասնակից են նաև գնումներին:
Դրանից է բխում նաև այն, որ շատ շատերը հարստացան և վարկաբեկվեցին: Անընդհատ խոսում ենք Վահագնի թաղամասից, Սևանից, այդպես էլ պարզ չի, թե այդ ֆրանսիացին որտեղից եկավ, էդ ամեն մի քարի մեջ զինվորի ճակատագիրն ինչի մտավ: Կոռուպցիան բանակում պետք է ընդհանրապես չլինի. այսօր կա, թաքնված է, բայց եթե մի քիչ թուլանանք, նորից կբարձրանան: Ոնց որ մի քիչ թուլացանք, սկսեցին թաղի տղերքը կրակել: Պարզվեց՝ զենքերը մոտներն է: Եթե մենք մեր փողոցներում և թաղերում այդ մշակույթը չոչնչացնենք, դա տարածվելու է և բանակ, և կրթություն, և ընտանիք: Կոռուպցիան միայն փող առնել-տալը չէ, ամենավտանգավոր կոռուպցիան հովանավորչությունն է»:
