Հայկական լրատվական կայքերը երեկվանից տարածում են տեղեկություններ այն մասին, որ օրեր առաջ Քանաքեռում տեղի ունեցած սպանությունների հետ առնչություն ունի ԱԺ պատգամավոր Հայկ Սարգսյանը: Ավելին, նշվում է, որ նա եղել է դեպքի վայրում: Տեղեկատվության աղբյուրը «Ժողովուրդ» օրաթերթի կայքէջում արված նման բովանդակությամբ հրապարակումն է, որն այսօր ևս տեղ էր գտել լրատվամիջոցներում՝ մամուլի տեսության տեսքով:
Պատգամավորը հերքում է իր առնչությունը սպանություններին ու ֆեյսբուքյան իր էջում հրապարակել է ապացույցներ այն մասին, որ այդ օրերին ինքը Կազանում է եղել, ի թիվս այլ պատվիրակությունների անդամների, հետևել ՀԱՊԿ միասնական զորավարժությունների ընթացքին:
Պատգամավորը մի քանի կետ է առանձնացրել, որոնք բոլորը փաստում են՝ ինքը սպանությունների նախորդ, հաջորդ օրերին, ինչպես և դեպքի օրը երկրում չի եղել.
Այսպես՝
«1․ Նոյեմբերի 10-ից 16-ը գործուղված եմ եղել Ռուսաստանի Դաշնություն, որպես ՀՀ ԱԺ ներկայացուցիչ մասնակցելու ՀԱՊԿ-ի զորավարժություններին։
2․ Դեպքի մասնակիցներից որևէ մեկին չեմ ճանաչել։
3․ Դեպքի մասին իմացել եմ հաջորդ օրը, լրատվամիջոցներից։
4․ Սահմանային անցակետում հաշվառված է նոյեմների 10-ից 16-ը իմ ՌԴ-ում գտնվելը (կից անձնագրիս կնիքները)։
5․ Կան բազմաթիվ լուսանկարներ և տեսանյութեր, որոնք փաստում են, որ նոյեմների 10-ից 16-ը եղել եմ ՌԴ-ում։
6. ՀԱԿՊ պաշտոնական էջի նոյեմբերի 11-ի հոդվածը ևս ապացուցում է, որ այդ օրը եղել եմ Կազանում»,-գրել է պատգամավորը՝ հրապարակելով ապացույցներ:
Սարգսյանը նաև հայտնել է, որ զրպարտության հիմքով դիմելու է դատարան, քանի որ լրատվամիջոցը կեղծ, իրականությանը չհամապատասխանող «փաստացի տվյալների» տարածման միջոցով փորձել է արատավորել իր պատիվն ու արժանապատվությունը։
«Փաստաբանիս հետ մտածում ենք նաև քրական գործ հարուցելու դիմում ներկայացնել։ Դեռ պետք է պարզել, այդ ստերի նպատակը» ,-եզրափակել է պատգամավորը։
Հիշեցնենք, հիշատակված դեպքը տեղի է ունեցել նոյեմբերի 11-ին, Քանաքեռում կրակոցների ու վիճաբանության հետևանքով սպանվել է 4 անձ, այդ թվում՝ Քանաքեռցի Տույ մականվամբ հայտնի քրեական հեղինակություն Արթուր Ղազարյանն ու նախկին պատգամավոր Արտուշ Սիմոնյանը: Սպանությունների փաստով քրեական գործ է հարուցված, ձերբակալված են նախկին պատգամավորի 3 որդիներն ու ևս մի քանի անձ:
