ՀՀ վարչապետ Նիկոլ Փաշինյանը ԱԺ-Կառավարություն հարցուպատասխանի ժամանակ անդրադարձավ այն հարցին, թե ինչո՞ւ դելիմիտացիայի և դեմարկացիայի աշխատանքները չեն սկսում:
Փաշինյանի խոսքով՝ դեռևս մայիսին Կառավարության նիստի ժամանակ ինքը հայտնել է, որ պատրաստ է ստորագրել իր սեղանին դրված առաջարկությունը դեմարկացիայի և դելիմիտացիայի գործընթաց սկսելու վերաբերյալ:
«Այո, նաև նախընտրական շրջանում, դրանից առաջ էլ, հետո էլ հայտարարել եմ, որ շատ կարևոր եմ համարում դեմարկացիայի և դելիմիտացիայի գործընթացն ավարտին հասցնելը, և, ըստ էության, մայիսին և դրանից հետո ՌԴ-ն 3 անգամ հանդես է եկել առաջարկով, և բոլոր անգամներն էլ մենք համաձայնություն ենք տվել այդ գործընթացով գնալ առաջ: Իմ տպավորությամբ՝ գործընթացը տեղից չի շարժվել Ադրբեջանի կողմից պրոցեսների ձգձգման և կոնկրետ պատասխան չտալու պատճառով»,- ասաց Կառավարության ղեկավարը:
Փաշինյանի խոսքով՝ երեկ ԱԽ նիստում իր ունեցած ելույթում հայտարարել է, որ սահմանային իրադրության խաղաղ հանգուցալուծումը շատ կարևոր է. «Նախկինում մեր արած առաջարկները ուժի մեջ են, այդ թվում՝ դելիմիտացիայի և դեմարկացիայի գործընթաց սկսելու վերաբերյալ»,- եզրափակեց նա:
