Այսօր խորհրդարանական ճեպազրույցների ժամանակ «Քաղաքացիական պայմանագիր» խմբակցության պատգամավոր Էդուարդ Աղաջանյանը պարզաբանեց, թե օրեր առաջ ինչու էր նշել՝ նոյեմբերի 16-ին արևելյան հատվածում սկսված փոխհրաձգության հետևանքով հայկական կողմն ունի 15 զոհ:
«Ես, երբ հայտարարել եմ 15 զոհ, մի քանի անգամ հատուկ նշել եմ, ոչ չճշտված տվյալների համաձայն՝ այս պահին կա 15 զոհ, հետագայում ՊՆ-ն ճշտված թվերը կհրապարակի»,- ասաց նա:
Հիշեցնենք, որ նոյեմբերի 16-ին ՀՀ Ազգային ժողովի արտաքին հարաբերությունների հանձնաժողովի նախագահ, «Քաղաքացիական պայմանագիր» խմբակցության պատգամավոր Էդուարդ Աղաջանյանն «Ազատության» եթերում հայտնել էր, որ, դեռևս չհաստատված տվյալներով, հայկական կողմն ունի 15 զոհ:
«Մեր տվյալներով՝ բավական մեծ կորուստներ են կրել Ադրբեջանի զինված ուժերը»,- ասել էր նա։
Նշենք, որ, ՊՆ-ի հրապարակած տվյալնների համաձայն, նոյեմբերի 16-ին ՀՀ արևելյան հատվածում սկսված փոխհրաձգության հետևանքով հայկական կողմից այս պահին հայտնի է 6 զոհի մասին:
