Երեւանի ավագանին առաջարկում է Հայկական հեռուստատեսության հիմնադրման 65 եւ ծննդյան 85-ամյակների առթիվ, հեռուստատեսության եւ ռադիոյի զարգացման գործում ներդրած նշանակալի ավանդի, արվեստի, գիտության եւ կրթության ոլորտում ունեցած հաջողությունների համար արվեստագիտության դոկտոր, պրոֆեսոր, գիտության վաստակավոր գործիչ, ՀՀ ԳԱԱ արվեստի ինստիտուտի թատրոնի բաժնի վարիչ Հենրիկ Վահանի Հովհաննիսյանին շնորհել «Երևանի պատվավոր քաղաքացի» կոչում:
Հենրիկ Հովհաննիսյանը հեղինակ է գիտական եւ հանրագիտարանային մի շարք հոդվածների: Դասավանդել է Երեւանի պետական, Խ. Աբովյանի անվան հայկական պետական մանկավարժական համալսարաններում և Գեղարվեստաթատերական ինստիտուտում: Հեռուստատեսությամբ վարել է մի շարք հեռուստահաղորդաշարեր՝ գրքի, լեզվի, մշակույթի վերաբերյալ, ինչպես նաև՝ նարեկյան ընթերցումներ:
2003 թվականին նրան շնորհվել է ՀՀ գիտության վաստակավոր գործչի պատվավոր կոչում: Պարգևատրվել է «Հայրենիքին մատուցած ծառայությունների համար» 1-ին աստիճանի մեդալով, ՀՀ մշակույթի նախարարության ոսկե մեդալով, «Սուրբ Սահակ-Սուրբ Մեսրոպ» և «Սուրբ Մեսրոպ Մաշտոց» շքանշաններով:
