ՀՀ առողջապահության նախարար Անահիտ Ավանեսյանն այսօր հրավիրած մամուլի ասուլիսի ժամանակ պարզաբանեց, թե ինչ ասել է կորոնավիրուսային հիվանդության դեմ պատվաստված անձինք ստանան քովիդի դեմ պատվաստանյութի երրորդ՝ խթանիչ կամ բուստեր դեղաչափը:
«Խթանիչ դեղաչափն ստանում են պատվաստանյութի ամբողջական դոզան, այսինքն՝ երկու դեղաչափն ստացած անձինք: Այսինքն՝ նրանք ստանում են մեկ դոզա ևս, այլ ոչ թե ևս երկու դեղաչափ պատվաստանյութ»,- ասաց նախարարը:
Ըստ նրա՝ խորհուրդ է տրվում խթանիչ դեղաչափով քովիդի դեմ պատվաստվել այն անձանց, որոնք չեն ստացել ՌՆԹ պատվաստանյութի տեսակով (mRNA-1273) պատվաստանյութ: «Հետազոտությունների արդյունքով շատ ավելի է արդյունավետության ցուցանիշը»,- պարզաբանեց առողջապահական գերատեսչության ղեկավարը:
Ավանեսյանի խոսքով՝ կարևոր է, որ երրորդ դեղաչափն ստանան ռիսկի խմբի ներկայացուցիչները, մասնավորապես՝ 65 տարեկանից բարձր անձինք, խրոնիկ հիվանդություններ ունեցող անձինք, բուժաշխատողները: Առողջապահության նախարարը շեշտեց՝ մեզ մոտ կան մարդիկ, որոնք պատվաստվել են երրորդ դեղաչափով, բայց վիճակագրության առումով այդ տոկոսը դեռ փոքր է:
Նախարարի խոսքով՝ երրորդ դեղաչափը կորոնավիրուսային հիվանդության դեմ պատվաստված անձը կարող է ստանալ քովիդի դեմ պատվաստանյութի երկու դեղաչափն ստանալուց վեց ամիս հետո:
Արդյոք սա վերաբերվո՞ւմ է նաև հոկտեմբերի 1-ից գործող կարգին, ըստ որի՝ աշխատավայր գնալիս անձը գործատուին պետք է ներկայացնի ՊՇՌ թեստի բացասական պատասխան կամ պատվաստման հավաստագիրը, այսինքն՝ այս դեպքում պատվաստված անձինք գործատուին պե՞տք է ներկայացնեն բուստեր դոզան հավաստող փաստաթուղթ, թե՞ ոչ, նախարարը պատասխանեց. «Դեռ պարտադիր չէ խթանիչ դոզան ստանալ, և այդ կարգի վրա որևէ ազդեցություն չի ունենում: Այս պահին չկա պարտադիր պահանջ, բայց առաջիկայում կտեսնենք՝ իրավիճակը ինչպես կփոխվի»:
