Ավստրիական հայտնի Mozartkugel քաղցրավենիքի խոշորագույն արտադրողներից մեկը՝ Salzburg Schokolade-ն, սնանկության հայց է ներկայացրել դատարան՝ կորոնավիրուսային համաճարակի հետևանքների և Ավստրիայում շոկոլադե արտադրանքի պահանջարկ ներկայացնող զբոսաշրջիկների բացակայության պատճառով:
Այս մասին հայտնել է APA գործակալությունը՝ հղում անելով ընկերության ղեկավարությանը։
Երեքշաբթի օրը Զալցբուրգի շրջանային դատարանում պետք է բացվի սնանկության գործը: Տնօրենի խոսքով՝ ընկերությունը 2020 թվականին համաճարակի պատճառով մեծ վնասներ է կրել, զբոսաշրջիկների թվի կտրուկ նվազման, ծննդյան տոնակատարությունների ու հարսանիքների բացակայության պատճառով ընկերության արտադրանքի նկատմամբ պահանջարկը նվազել է, ինչը հանգեցրել է վաճառքի զգալի նվազմանը։ Բացի այդ, Վիեննայում և Զալցբուրգում հրուշակեղենի խանութները շաբաթներ շարունակ փակ են մնացել, գրում է գործակալությունը։
Արտադրողը չի կարողացել նաև իր աշխատակիցներին վճարել նոյեմբեր ամսվա աշխատավարձը և ավանդական դարձած «Սուրբծննդյան բոնուսը»։
Ընկերությունը ստեղծվել է 1897 թվականին՝ Զալցբուրգում։
