«Հայաստան» համահայկական հիմնադրամի կողմից հավաքագրված եւ ՀՀ պետական բյուջե փոխանցված միջոցների օգտագործումն ուսումնասիրող ԱԺ քննիչ հանձնաժողովը նպատակ ունի ճշմարտությունը վերհանել, հաստատել կամ հերքել միջոցների օգտագործման օրինականությունը, կասկածները փարատել:Նոյեմբերի 30-ին հանձնաժողովի անդրանիկ նիստում այս մասին վստահեցրեցին պատգամավորները:
Ընդդիմադիր խմբակցությունների առաջարկով, իրավունքի ուժով ստեղծված հանձնաժողովը կազմված է 11 անդամից: Հանձնաժողովի նախագահը «Հայաստան» խմբակցությունից Արծվիկ Մինասյանն է: Հանձնաժողովում «Հայաստան» խմբակցությունն ունի 3 ներկայացուցիչ, «Պատիվ ունեմ»-ը՝ 1 ներկայացուցիչ, «Քաղաքացիական պայմանագիրը»՝ 7 ներկայացուցիչ: Հանձնաժողովը ստեղծված է 6-ամսյա գործունեության ժամկետով:
«Մեր հայրենակիցների, Հայաստանին և Արցախին աջակիցների կողմից «Հայաստան» համահայկական հիմնադրամին փոխանցված գումարները փոխանցվել են ՀՀ պետբյուջե, և հանձնաժողովի առջև խնդիր է դրված փոխանցման և օգտագործման օրինականությունը ստուգելը, ուսումնասիրելն ու եզրակացություններ տալը»,-ասաց Արծվիկ Մինասյանն ու հավելեց, որ այդ կարճ ժամանակում պետք է հասնեն հանձնաժողովի առջև դրված խնդրի արդյունավետ լուծմանը:
Առաջին նիստում հանձնաժողովը հաստատեց օրակարգը:
ՔՊ-ից Բաբկեն Թունյանը նկատեց, որ հանձնաժողովը ստեղծվել է սկիզբ առած կասկածի հիման վրա: «Իմ կարծիքով՝ այդ վստահությունը կորսվել է անհարկի մեղադրանքների պատճառով: Եթե քննիչ հանձնաժողովը վերջում գա այն եզրակացության, որ հիմնադրամի կողմից բյուջե փոխանցումը եղել է արդարացված և միջոցներն օգտագործվել են արդյունավետ, արդյոք մենք գործընկերային հայտարարո՞ւմ ենք, որ այն, ինչ մինչև հիմա հնչեցվել է, եկեք դնենք մի կողմ, իրականում խնդիր գոյություն չի ունեցել և դրանով վերականգնենք հիմնադրամի նկատմամբ վստահությունը՝ անկախ մեր քաղաքական տարաձայնություններին»,-ասաց պատգամավորը:
Մինասյանն որպես հանձնաժողովի նախագահ արձագանքեց. «Մեր նպատակը ճշմարտությունը վերհանելն է, հաստատել կամ հերքել միջոցների օգտագործման օրինականությունը, եթե կան չարաշահումներ, ապա պատշաճ ընթացք տալ և մեղավորներին բացահայտել, պատժի ենթարկել, համապատասխան վարույթները հարուցել, վերականգնել ապօրինի օգտագործված գումարը, վերականգնել այն խաթարված հեղինակությունը, որ ցավոք սրտի, հանրության տարբեր հատվածներում ձևավորվել է»:
Հանձնաժողովի նպատակն է լիարժեքորեն փարատել հանրության մոտ ստեղծված կասկածները, եթե չկան չարաշահումներ, բացահայտել, ներկայացնել դրանք:
Մինասյանն էլ հարցրեց՝ եթե բացահայտվեն չարաշահումներ, իշխանությունը պատրա՞ստ է ճշմարիտ ձևով ներկայացնելու սխալները, թերությունները: Թունյանը վստահեցրեց, որ ավելի շահագրգիռ կողմ, քան իշխանությունն է, չկա, որ այդ պրոցեսն ամբողջությամբ խոշորացույցով անցկացվի, եթե կան չարաշահումներ, ապա հետևանքներ ունենան:
Հանձնաժողովը պետք է ընտրի նախագահի տեղակալ, հաստատի աշխատակարգը:
Հանձնաժողովը նաև հարցեր կուղղի կառավարությանը:
