Bild-ը հրապարակել է Ռուսաստանի՝ Ուկրաինա «ներխուժման» ծրագիրը

Գերմանական Bild թերթը հրապարակել է Ռուսաստանի՝ Ուկրաինա ենթադրյալ ներխուժման սխեման։ Հրապարակման մեջ օգտագործվել են ՆԱՏՕ-ի և Ուկրաինայի հետախուզությանը մոտ կանգնած աղբյուրների տեղեկություններ։

Հրապարակման մեջ նշվում է, որ հարձակումը նախատեսված է 2022 թվականի հունվար-փետրվար ամիսներին և ունի երկու տարբերակ.

Առաջինի համաձայն՝ Ռուսաստանը միաժամանակ հարձակում կսկսի Ղրիմից և չճանաչված Դոնեցկի և Լուգանսկի ժողովրդական հանրապետություններից։

Երկրորդի համաձայն՝ ռուսական զորքերը փուլային հարձակում են կազմակերպում Ուկրաինայի վրա՝ նախ հարավից, ապա հյուսիս-արևելքից, ապա հյուսիսից՝ դեպի Կիև։

Այսպիսով, ըստ թերթի, Ռուսաստանը պատրաստվում է օկուպացնել Ուկրաինայի տարածքի երկու երրորդը։

ՌԴ ԱԳՆ պաշտոնական ներկայացուցիչ Մարիա Զախարովան արձագանքել է Bild-ի հրապարակմանը։ Նրա խոսքով՝ թերթը «փորփրել է գերմանական արխիվները և հրապարակել «Պուտինի ներխուժման ծրագիրը Ուկրաինա» հոդվածը։

Մասնավորապես, Զախարովան ուշադրություն է հրավիրել այն փաստի վրա, որ քարտեզի վրա Լվով քաղաքը նշված է որպես Լեմբերգ, այլ ոչ թե Լվիվ։ Առաջին տարբերակը նացիստներն օգտագործել են 1942 թվականի քարտեզներում, իսկ երկրորդը հայտնվում է Գերմանիայի ԱԳՆ պաշտոնական փաստաթղթերում։

Զախարովան հրապարակումը որակել է անհեթեթություն։