Խորհրդարանն այսօրվա նիստում առաջին ընթերցմամբ ընդունեց ՀՀ աշխատանքային օրենսգրքում լրացումներ և փոփոխություններ կատարելու մասին նախագիծը՝ 55 կողմ, 23 դեմ, 6 ձեռնպահ ձայներով:
Նախագծով՝ գործատուին իրավունք է տրվում չթույլատրել աշխատողին ներկայանալ աշխատանքի վայր և չվճարել աշխատավարձ, եթե աշխատողը չի ներկայացնում Covid-ի դեմ պատվաստումը կամ ՊՇՌ թեստավորումը հաստատող փաստաթղթերը:
Աշխատանքի չթույլատրվելու հետևանքով ավելի քան 10 աշխատանքային օր անընդմեջ կամ վերջին երեք ամսվա ընթացքում՝ ավելի քան 20 աշխատանքային օր աշխատողի՝ իր աշխատանքային պարտականությունները չկատարելու դեպքում գործատուն իրավունք է ստանում լուծել աշխատանքային պայմանագիրը: Աշխատանքային պայմանագիրը լուծելու դեպքում գործատուն պարտավոր է աշխատողին գրավոր ծանուցել ոչ ուշ, քան 3 օր առաջ:
