Այսօր՝ դեկտեմբերի 8-ին, ԱԺ հերթական նիստում շարունակում է քննարկվել 2022 թվականի բյուջեի մասին նախագիծը:
Ֆինանսների նախարար Տիգրան Խաչատրյանը ներկայացրեց երեքշաբաթյա ժամկետում տեղի ունեցած փոփոխությունները:
«Լրամշակված նախագիծը եկամուտների մասով նախատեսում է 1 տրիլիոն 947.8 մլրդ դրամ: Բյուջեի ծախսերը կազմում են 2 տրիլիոն 184 մլրդ դրամ, իսկ դեֆիցիտը՝ 236.2 մլրդ դրամ»,- հայտարարեց նախարարը և հավելեց, որ եկամուտներում, ծախսերում և դեֆիտում փոփոխություններն ունեցել են մի քանի պատճառներ, որոնցից առաջինը օրենքով սահմանված՝ արտարժութային ծախսերի, եկամուտների և ֆինանսավորման աղբյուրների դրամային մեծության վերահաշվարկումն է սույն թվականի նոյեմբերի 1-ի փոխարժեքով:
Նրա խոսքով՝ առաջնահերթությունների հավելվածում ներառված են 85 մլրդ 556 մլն դրամ ընդհանուր արժեքով լրացուցիչ միջոցառումներ:
«2022 թվականի պետբյուջեի նախագիծը ձևավորվել է Կառավարության 2021-2026 թվականների ծրագրով սահմանված առաջնահերթություններին համահունչ՝ հատուկ կարևորելով անվտանգային հարցերի, կրթական համակարգերի, ինչպես նաև ներառական և որակյալ ենթակառուցվածքների զարգացման հարցերի լուծումը»,- հայտարարեց Տիգրան Խաչատրյանը:
Նա նշեց, որ 2022 թվականի համար պետբյուջեի կապիտալ ծախսերը կկազմեն 352 մլրդ դրամ կամ ՀՆԱ-ի 4.5 տոկոսը. «Համայնքներին կհատկացվեն մոտ 18.4 մլրդ դրամով կապիտալ նշանակության սուբվենցիաներ: Նախատեսվում է իրականացնել 2 տրիլիոն 184 մլրդ դրամ ընդհանուր դրամով ծախսեր, ինչը մոտ 184 մլրդ դրամով ավելի է, քան 2021 թվականի ճշտված ծախսային բյուջեն, կամ 334 մլրդ դրամով ավելի, քան տարվա համար նախապես հաստատվածը»:
Ֆինանսների նախարարի խոսքով՝ 2022 թվականին տարածքային կառավարման և ենթակառուցվածքների նախարարության կապիտալ ծախսերը, որոնք հիմնականում ենթակառուցվածքային նշանակության են, կազմելու են 145 մլրդ դրամ կամ 2021 թվականի ճշտված բյուջեով որոշված ցուցանիշից 61.8 տոկոսով ավելի: ԿԳՄՍ նախարարության կապիտալ ծախսերը կազմելու են 33 մլրդ դրամ կամ 3.6 անգամ ավելի, քան 2021 թվականին: Առողջապահության նախարարության կապիտալ ծախսերը կազմելու են 7.2 մլրդ դրամ կամ 2.1 անգամ ավելի, քան 2021 թվականին:
