Հայ կինոռեժիսոր Հայկ Չիլինգարյանի «Լույսի կաթիլներ» ֆիլմը Ճապոնիայում արժանացել է «Ոսկե հաղթող» մրցանակին։ Ինչպես հայտնում են Ճապոնիայում ՀՀ դեսպանությունից ֆիլմը Տոկիոյի կինոմրցանակաբաշխության ժամանակ հաղթել է «լավագույն դրամա» անվանակարգում։
Ֆիլմի գործողությունները տեղի են ունենում Հայաստանում 1990-ականներին՝ Առաջին Ղարաբաղյան պատերազմի տարիներին։ Ֆիլմի գլխավոր հերոսը՝ զինվորական բանտարկությունից ազատված Արսենը ապրում է ԽՍՀՄ փլուզումը, ծնողների և ընկերոջ կորուստը։
Ութսուն րոպեանոց ֆիլմի վրա աշխատել են նաև ռեժիսոր և սցենարիստ Գարիկ Մաշկարյանը, օպերատոր Արտո Խաչատուրյանը, նկարիչ Ներսես ՍԵդրակյանը և կոմպոզիտոր Լևոն Թևանյանը։ Գլխավոր դերերում հանդես են եկել Սասուն Սարգսյանն ու Էմմա Բաբախանյանը։
«Tokyo Film Awards»-ը Ճապոնիայի ռեժիսորների և հեռուստատեսության ներկայացուցիչների կողմից նախաձեռնված կինոմրցույթի հարթակ է, որը հիմնականում ուշադրություն է դարձնում կարճամետրաժ ֆիլմերի վրա՝ փորձելով բացահայտել երիտասարդ տաղանդներին:
