Արդեն մոտ մեկ ժամ է՝ ՀՀ արտաքին գործերի նախարարության շենքում են գտնվում Ազատագրական շարժման ներկայացուցիչները: Նրանք պահանջում են հանդիպում ՀՀ ԱԳ նախարար Արարատ Միրզոյանի հետ՝ ակնկալելով, որ Միրզոյանը հայտնի ԱԳՆ դիրքորոշումը Արցախի հետագա ճակատագրի վերաբերյալ:
«Զարթոնք» կուսակցության ղեկավար Արա Զոհրաբյանը նշեց, որ հավաքվել են ու կոչ են անում հայ ազգը միանա իրենց: «Հարցեր ունենք ԱԳՆ նախարարին, ուզում ենք դրանց պաշտոնական պատասխան տրվեն»,- ասաց Զոհրաբյանը:
Ավելի ուշ «Կամքի» անդամ Վահագն Չախալյանը վրդովված կերպով սկսեց ոստիկանների հետ բանակցել և իր բողոքները նրանց ներկայացնել: Ոստիկաններից մի քանիսը Չախալյանին հորդորեցին հանգիստ եւ առանց բղավոցների խոսել, վերջինս, չանսալով նրանց հորդորներին, շարունակում էր հուզախառն և ագրեսիվ ելույթը: Րոպեներ հետո ոստիկաններն առաջացան դեպի Չախալյանը՝ նրան բերման ենթարկելու նպատակով, որից հետո հավաքվածների եւ ոստիկանների միջեւ քաշքշուկ սկսվեց:
ՀՀ ոստիկանությունից հայտնեցին, որ Վարչական իրավախախտումների վերաբերյալ օրենսգրքի 182 հոդվածով նախատեսված արարք կատարելու համար կա 13 բերման ենթարկված (Ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը), որոնց թվում են Նաիրի Հոխիկյանը և Վահագն Չախալյանը:
Այս պահին էլ ոստիկանները ԱԳՆ շենքի տարածում պահպանում են հասարակական կարգը, Ազատագրական շարժման ներկայացուցիչներից ևս անդամներ կան դեռ արտաքին գերատեսչության շենքում: Անվտանգության աշխատակիցներից մեկը նրանց հայտնեց, որ իրենց խնդրանքը փոխանցվել է ԱԳՆ քարտուղարին, խոստացել են, որ շարժման անդամների հետ հանդիպող կլինի:
