«3+3»-ը պետք է դրական միտում մտցնի տարածաշրջանի երկրների հարաբերություններում. ՌԴ դեսպան

Սերգեյ Կոպիրկինը «3+3» տարածաշրջանային համագործակցության ձևաչափը դիտարկում է որպես ևս մեկ հարթակ հայ–ռուսական փոխգործակցությունը զարգացնելու համար։

«3+3» ձևաչափը պետք է դրական միտում ավելացնի տարածաշրջանի երկրների փոխհարաբերություններում, Երևանում «Նոր սերունդ» ծրագրի սաների հետ հոբելյանական հանդիպումից հետո լրագրողների հետ զրույցում ասաց Հայաստանում ՌԴ դեսպան Սերգեյ Կոպիրկինը։

Հարավային Կովկասում իրավիճակի կարգավորմանն ուղղված «3+3» հարթակի առաջին նիստն անցկացվել է Մոսկվայում դեկտեմբերի 10-ին։ Հանդիպմանը մասնակցել են Հայաստանի, Ռուսաստանի, Իրանի, Ադրբեջանի և Թուրքիայի փոխարտգործնախարարները։

ՌԴ դիվանագետը կարծում է, որ ԱԳՆ–ի հայտարարությունը բավական հասկանալի արտացոլում է Ռուսաստանի վերաբերմունքը տարածաշրջանային այդ ձևաչափի նկատմամբ որպես բոլոր երկրներին հուզող հարցերի քննարկման հնարավորություն։

«Այս ձևաչափի արժեքը երկխոսության հնարավորություն տալու մեջ, այն հարցերի շուրջ կարծիքների փոխանակման համար, որոնք հետաքրքրում են տարածաշրջանի բոլոր երկրներին։ Այսինքն` ձևաչափը պետք է պոզիտիվ մտցնի այդ երկրների փոխհարաբերություններում», – ասաց դեսպանը։

Դիվանագետը հավելեց, որ այս ձևաչափը նաև լրացուցիչ ուղղություն և հարթակ է հայ–ռուսական համագործակցության համար։Ավելի վաղ ՌԴ ԱԳՆ–ն հայտարարել էր, որ հանդիպման մասնակիցները պայմանավորվել են հարթակի աշխատանքը կենտրոնացնել բոլոր մասնակիցներին հետաքրքրող հարցերի վրա։ Այդ թվում` վստահության բարձրացման միջոցների, առևտրատնտեսական, տրանսպորտային, մշակութային ու հումանիտար ոլորտներում փոխգործակցության, ընդհանուր մարտահրավերների և սպառնալիքների դիմակայման վրա։ 5 երկրների ներկայացուցիչներ շահագրգռվածություն են հայտնել հարթակին աշխատանքներին Վրաստանի միանալու առնչությամբ` նշելով, որ նրանց համար «դուռը» շարունակում է բաց մնալ։