ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 235-րդ հոդվածի 1-ին մասով և 258-րդ հոդվածի 4-րդ մասով հարուցվել է քրեական գործ, որի շրջանակներում իրականացվում են քննչական և դատավարական այլ գործողություններ՝ Երևան քաղաքի Վ.Դավթյան փողոցում կրակոցներ արձակելու դեպքի հանգամանքները պարզելու ուղղությամբ:
Հիշեցնենք, որ Shamshyan.com-ը հայտնել էր, որ կրակել են 01 PZ 015 պետհամարանիշի Մայբախմեքենայի վրա: Մամուլում լուրեր եղան, որ այդ մեքենան պատկանում է Սուքիասյանների ընտանիքին:
Infoport.am-ին այլ մանրամասներ են հայտնի դարձել կապված միջադեպի հետ։ Մեզ հասած տեղեկություններով մեքենայի սեփականատերը գյումրեցի շինարար Արամ Արաիկի Սմբատյանն է, ով գրանցված է Ծուլուկիձեի փողոցում:
Ավելացնենք, որ ըստ քննչական կոմիտեի նախնական տվյալների 2021թ. դեկտեմբերի 11-ին՝ ժամը 16։15-ի սահմաններում, ենթադրյալ հանցագործություն կատարած անձը, դիտավորությամբ կոպիտ կերպով խախտելով հասարակական կարգը, իր մոտ ապօրինի պահվող ինքնաձիգից կրակոցներ է արձակել Երևան քաղաքի Վ.Դավթյան փողոցում կայանված «Մերսեդես-Բենց» մակնիշի ավտոմեքենայի ուղղությամբ’ վնասելով այն:
Այնուհետև, շարունակելով իր խուլիգանական գործողությունները, վերջինս նույն փողոցում գտնվող խանութի մոտ, ապա՝ Երևան քաղաքի Արաբկիր 17 և Ռիգա փողոցների հատման վայրում կրակոցներ է արձակել դեպի օդ և դիմել փախուստի: Կատարվել է դեպքի վայրի զննություն, որի ընթացքում հայտնաբերվել է 10 հատ 7.62 մմ տրամաչափի կրակված պարկուճ, իսկ «Մերսեդես-Բենց» մակնիշի ավտոմեքենայի վրա հայտնաբերվել է կրակոցներից առաջացած 12 հետք:
Հարցաքննվել են մի շարք վկաներ, նշանակվել են դատաձգաբանական, հետքաբանական և դատաապրանքագիտական փորձաքննություններ: Ձեռնարկված միջոցառումների արդյունքում պարզվել է ենթադրյալ հանցագործություն կատարած անձի ինքնությունը, ով Երևան քաղաքի’ 1983թ. ծնված բնակիչ է:
Հանձնարարություն է տրվել ՀՀ ոստիկանության համապատասխան բաժնին՝ ձեռնարկել անհրաժեշտ միջոցառումներ՝ 38-ամյա տղամարդուն հայտնաբերելու ուղղությամբ: Նախաքննությունը շարունակվում է:
