Այսօր՝ դեկտեմբերի 16-ին, Ազգային ժողովում հրավիրվել է արտահերթ նիստ, որի ժամանակ Վահագն Ալեքսանյանն իր ելույթում անդրադարձավ Թագուհի Թովմասյանի ելույթին։
«Պարոն Կիրակոսյան ուզում եմ շնորհակալություն հայտնել Ձեզ, որ ի տարբերություն շատերի, ովքեր մարդու իրավունքներն ու առհասարակ իրավունքների մասին բարձրաձայնումն օգնագործում են միայն ու միայն, որպես քաղաքական շահերից ու նպատակահարմարություններից ելնելով, Դուք իրապես, առանց քաղաքական ալիքի մեջ գտնվելու, միջազգային ատյաններում պաշտպանում եք Հայաստանի հանրապետության շահերը և Հայաստանի Հանրապետության քաղաքացիների շահերը։ Շնորհակալություն եմ հայտնում Ձեզ։
Ինչ վերբերվում է Տիկին Թովմասյանի նոր հնչեցրած մտքերին, որոնք իրենը չէին, իհարկե, Ադրբեջանի նախագահ Իլհամ Ալիևինն էին, ես կարծում եմ Տիկին Թովմասյան Ձեր այդ ելույթը, որպես էդպիսին, լավագույն օրինակ էր ելույթների, որոնք Պարոն Կիրակոսյանին և նրա թիմին խանգարում են միջազգային ատյաններում։ Որովհետև ուղղակի չի կարելի Ադրբեջանի նախագահի խոսքերը, որոնք բոլորիս ակնհայտ է թե ինչ պատճառներով են ասվում, բերել ու կրկնել ՀՀ Ազգային ժողովում՝ առանց հերքման։ Դուք Մարդու իրավունքների մշտական հանձնաժողովի նախագահ եք Տիկին Թովմասյան, դուք կրկնում եք Ադրբեջանի նախագահի խոսքերն ու չեք հերքում։
